काठमाडौं । पूर्वप्रधानमन्त्री डा. बाबुराम भट्टराईले सत्तारुढ दलभित्र सरकार र पार्टीबीचको असमझदारी बढ्नु देश र लोकतन्त्रका लागि शुभ संकेत नभएको बताएका छन्। सामाजिक सञ्जालमार्फत आफ्नो धारणा सार्वजनिक गर्दै उनले नवोदित सत्तारुढ दलभित्रको मतभेद सार्वजनिक रूपमा पोखिन थालेकोप्रति चिन्ता व्यक्त गरेका हुन्।
डा. भट्टराईले नेपाली राजनीतिमा आन्तरिक कलहले पुर्याएको क्षतिको इतिहास स्मरण गराएका छन्। उनले २००७ सालपछि नेपाली कांग्रेसमा बीपी र मातृका समूह, २०४७ पछि ७४ र ३६ सांसद समूह तथा २०५८ पछि गिरिजा र देउवा समूहबीचको विवाद, २०५२ पछि नेकपा एमालेमा महाकाली सन्धि पक्षधर र विरोधी समूहबीचको टकराव, र २०६४ पछि माओवादीभित्र संविधान बनाउने र जनविद्रोह गर्ने समूहबीचको अन्तर्संघर्ष र फुटले देश, लोकतन्त्र र जनतालाई ठूलो नोक्सान पुर्याएको उल्लेख गरे। इतिहास दोहोरिन्छ किनभने मानिसले आफ्ना गल्ती दोहोर्याउँछन् भन्ने भनाइ पनि उनले उद्धृत गरेका छन्।
जेनजी विद्रोहको जगमा बनेको युवा बाहुल्य पार्टी र सरकारले इतिहासका गल्ती नदोहोर्याओस् भन्ने कामना गर्दै डा. भट्टराईले इतिहासबाट पाठ सिकेर नयाँ इतिहास निर्माण गर्न सुझाव दिएका छन्।
