जनकपुरधाम — मधेश प्रदेशमा जनता समाजवादी पार्टी नेपाल, नेकपा एमाले र नेपाली कम्युनिस्ट पार्टी मिलेर बन्ने नयाँ सत्ता समीकरण लगभग टुङ्गिने चरणमा पुगेको छ । तीन दलबीच नयाँ सरकार गठन गर्ने विषयमा सहमति करिब अन्तिम अवस्थामा पुगेको नेताहरूले बताएका छन् । नयाँ सरकारको नेतृत्व जसपा नेपालले गर्ने सम्भावना बढी देखिएको छ ।
एमालेका संसदीय दलका नेता सरोज कुमार यादवका अनुसार तीन दलका शीर्ष नेताबीच छलफल भएर सरकार बनाउने विषयमा सहमति जुटेको हो । एमाले अध्यक्ष केपी शर्मा ओली, नेकपाका अध्यक्ष पुष्पकमल दाहाल प्रचण्ड र जसपा नेपालका अध्यक्ष उपेन्द्र यादवबीच समीकरणबारे छलफल भएको उनले जानकारी दिए । नेतृत्व कसले गर्ने भन्ने विषयमा छिट्टै निष्कर्ष निस्कने उनको भनाइ छ ।
स्रोतका अनुसार जसपा नेपालको नेतृत्वमा मुख्यमन्त्री बन्ने विषय करिब निश्चित जस्तै छ । जसपा नेपालका मधेश प्रदेश संसदीय दलका नेता सरोज कुमार यादव मुख्यमन्त्री बन्ने सम्भावना बलियो रहेको बताइएको छ ।
यसअघि असोज ३० गते एमालेले मधेश सरकारबाट समर्थन फिर्ता लिएपछि नेपाली कांग्रेस नेतृत्वको सरकार अल्पमतमा परेको थियो । मुख्यमन्त्री कृष्णप्रसाद यादव सरकार जोगाउने प्रयासमा छन् । पछिल्लो समय एमाले उही सरकारमा फर्किने विषयमा पनि संवाद भएको थियो । त्यसका लागि कांग्रेस सभापति गगन थापा र एमाले अध्यक्ष ओलीबीच छलफल समेत भयो । तर समर्थन फिर्ता लिएको सरकारमा पुनः फर्किँदा नकारात्मक सन्देश जाने भन्दै ओलीले नमानेपछि नयाँ समीकरण बन्ने बाटो खुलेको हो ।
