चितवन । राष्ट्रिय स्वतन्त्र पार्टीका सभापति रवि लामिछानेले प्रधानमन्त्रीका प्रमुख सल्लाहकार कुमार बेनमाथि छानबिन हुने वा नहुने भन्ने प्रश्नमा सरकारका निकाय स्वतन्त्र रहेको बताएका छन् । बिहीबार चितवन पुगेका लामिछानेलाई पत्रकारहरूले बेनमाथि छानबिन आवश्यक ठान्नुहुन्छ कि ठान्नुहुन्न भनेर सोधेका थिए ।
जवाफमा लामिछानेले सरकारका निकायहरूले संविधान र कानुनले दिएको अधिकार सही ढंगले उपयोग गर्न स्वतन्त्र रहेको बताए । पत्रकारले प्रश्न दोहोर्याएपछि उनले भने, ‘उहाँले आपराधिक क्रियाकलाप गर्नुभएको छ भने किन हुँदैन कारबाही ?’
पत्रकारहरूले मिडिया र पत्रकारमाथि सरकारले प्रहरी लगाएर गरेको धरपकड, प्रहरी महानिरीक्षक दानबहादुर कार्कीलाई हटाइएको विषय र इनम सापकोटा प्रकरणसँगै बेनको विषयलाई जोडेर प्रश्न गरेका थिए ।
प्रहरी हिरासतमा रहेका सापकोटाबाट बरामद दुईवटा मोबाइल फोन डिजिटल फरेन्सिक परीक्षणअघि दुई दिनसम्म बेनले आफ्नो घरमा राखेको विषय यसअघि सार्वजनिक भएको थियो । प्रहरी स्रोतका अनुसार सापकोटा सम्पत्ति शुद्धीकरणसम्बन्धी कसुरमा अनुसन्धानमा छन् । ती मोबाइल जावलाखेलस्थित बेनको घरमा रहेको लोकेसन ट्र्याकबाट देखिएको स्रोतको दाबी छ ।
फरेन्सिक परीक्षणमा उक्त अवधिमा मोबाइलबाट ह्वाट्सएप र फेसबुक प्रयोग भएको, विभिन्न सामग्रीका स्क्रिनसट लिइएको र केही सन्देश मेटिएको देखिएको स्रोतले बताएको छ । तीमध्ये सापकोटा र बेनबीच आदानप्रदान भएका केही सन्देश पनि मेटिएको दाबी छ ।
बेनले भने यस विषयमा पठाइएका चारवटा प्रश्नको जवाफ दिन चाहेनन् । उनले दाबी स्वीकार वा अस्वीकार गरेनन् ।
