चितवनको राप्ती नगरपालिका–५ सिपडाँडामा शुक्रबार अपराह्न जीप दुर्घटना हुँदा २५ जना घाइते भएका छन्। भण्डाराबाट थाकलटारतर्फ जाँदै गरेको बलेरो जीप अनियन्त्रित भएर सडकबाट करिब ५० मिटर तल खोल्सामा खसेको जिल्ला प्रहरी कार्यालय चितवनले जनाएको छ।
प्रहरीका अनुसार शुक्रबार दिउँसो साढे ४ बजे बा.प्र.०१–०३५ च २८८६ नम्बरको जीप सिपडाँडास्थित भित्री सडकखण्डमा गुडिरहेका बेला चालकले नियन्त्रण गुमाएका थिए। जीपमा सवार सबै २५ जना घाइते भएका छन्।
घाइतेहरूलाई तत्काल उद्धार गरी उपचारका लागि अस्पताल पठाइएको छ। उनीहरूको अवस्था मध्यम रहेको प्रहरीले जनाएको छ। घाइतेहरूको नाम र ठेगाना भने अहिलेसम्म खुल्न सकेको छैन।
प्रहरीले दुर्घटनास्थलमा पुगेर घाइतेको उद्धार गरेको थियो। अस्पताल पुर्याइएका घाइतेको उपचार भइरहेको छ। दुर्घटनाको कारणबारे थप अनुसन्धान भइरहेको जिल्ला प्रहरी कार्यालय चितवनले जनाएको छ।
