काठमाडौँ — वरिष्ठ चिकित्सक प्रा. डा. गोविन्द केसीका माग पूरा गर्न नेपाल चिकित्सक संघले सरकारलाई ४८ घण्टाको समयसीमा दिएको छ। तोकिएको समयभित्र माग सम्बोधन नभए आन्दोलनका कार्यक्रम घोषणा गर्ने संघको चेतावनी छ।
संघले शुक्रबार सार्वजनिक गरेको विज्ञप्तिमा डा. केसी आमरण अनसनमा बसेको नौ दिन बितिसक्दा पनि सरकारले उनका मागमा कुनै ठोस पहल नगरेको उल्लेख छ। पच्चीसौँ पटक अनसनमा रहेका डा. केसीको स्वास्थ्यमा जटिल समस्या देखिन थालेको भन्दै संघले उनको जीवन जोगाउन तत्काल वार्ता टोली गठन गर्न आग्रह गरेको छ।
विज्ञप्ति जारी गर्नुअघि संघको केन्द्रीय कार्यालयमा बसेको बैठकमा पूर्वअध्यक्ष, पूर्वमहासचिव, विशेषज्ञ चिकित्सक समाजका प्रतिनिधि, अस्पताल निर्देशक र आवासीय चिकित्सकहरू सहभागी भएका थिए। बैठकमा डा. केसीको अवस्था र सरकारको भूमिकाबारे विस्तृत छलफल भएको संघले जनाएको छ।
संघले डा. केसीका माग पूरा गरी अनसन अन्त्य हुने वातावरण बनाउन सरकारसँग फेरि जोडदार आग्रह गरेको छ। माग पूरा नभए घोषणा हुने आन्दोलनबाट सर्वसाधारणको स्वास्थ्य सेवामा पर्न सक्ने असरको जिम्मेवारी सरकारले नै लिनुपर्ने विज्ञप्तिमा उल्लेख छ।
