राष्ट्रिय स्वतन्त्र पार्टी (रास्वपा) का सभापति रवि लामिछानेले प्रेस, प्रहरी र अदालतजस्ता राज्यका संस्थालाई कमजोर पारेर लोकतन्त्र बलियो बनाउन नसकिने बताएका छन्।
शुक्रबार चितवनमा आयोजित कार्यक्रममा उनले अदालतबारे गरिने हल्का टिप्पणीले न्यायालय कमजोर हुने र त्यसको असर समग्र राज्य व्यवस्थामा पर्ने धारणा राखे। अदालत, प्रहरी, सुरक्षा निकाय, निजी क्षेत्र, वैदेशिक सम्बन्ध, पेशागत संगठन र प्रेस सबै कमजोर भए देश नै कमजोर हुने उनको भनाइ थियो।
‘यो देशमा भएभरका संस्थाहरू कमजोर हुने हो भने यो देश कमजोर हुन्छ, लोकतन्त्र कमजोर हुन्छ,’ उनले भने। कमजोर लोकतन्त्रले ठूला कुरा गर्न सक्ने भए पनि काम गर्न नसक्ने उनले बताए। लोकतन्त्रका आधारस्तम्भलाई कमजोर बनाउने गतिविधि र निर्णयप्रति सबै सचेत हुनुपर्ने उनको भनाइ थियो।
सभापति लामिछानेले राज्यका संस्थालाई स्वतन्त्र रूपमा काम गर्न दिनुपर्नेमा जोड दिए। विशेषगरी प्रहरी र केन्द्रीय अनुसन्धान ब्युरोलाई बलियो बनाएर अनुसन्धानमा राजनीतिक वा अन्य कुनै हस्तक्षेप हुन नहुने उनले बताए।
‘थुन्ने र सुन्ने कुरा होइन, पहिला सुन्नुपर्छ र सुनिसकेपछि अनुसन्धान राम्रोसँग गरिसकेपछि कुनै भ्रष्टलाई पक्राउ गर्दा अनुसन्धान यति बलियो होस् कि त्यो अदालतबाट फर्केर घर होइन, जेल जाओस्,’ उनले भने।
उनले चुनावका बेला रास्वपाले भ्रष्टाचारीलाई जेल हाल्ने प्रतिबद्धता गरेको तर विधिको शासन र कानुनी प्रक्रियामार्फत अनुसन्धान गर्ने भनिएको बताए। जसलाई जहाँ भेट्यो, त्यसलाई समातेर जेल हाल्ने कुरा नभएको उनले स्पष्ट पारे।
भ्रष्टाचारीमा राज्यको त्रास र सर्वसाधारणमा आस हुनुपर्ने उनको भनाइ थियो। जनतामै त्रास पैदा हुने अवस्था सही बाटो नहुने उनले बताए।
आफू पार्टी सञ्चालन र सरकारका गतिविधिलाई सहज रूपमा अघि बढाउन तथा आवश्यक परेका बेला सल्लाह दिन जिम्मेवारीमा बसेको उनले बताए। पार्टीले सरकारलाई नागरिकको सेवामा काम गर्न कुनै बाधा सिर्जना नगर्ने पनि उनले स्पष्ट पारे।
