भारतीय क्रिकेट टोलीका अनुभवी तीव्र गतिका बलर मोहम्मद शमीले टेस्ट क्रिकेटलाई बिदाइ गरेका छन्। उनले शुक्रबार राति सामाजिक सञ्जालमार्फत सार्वजनिक गरेको भिडियोमार्फत आफ्नो निर्णयबारे जानकारी दिएका हुन्। सेतो जर्सीसँग जोडिएका सम्झनालाई कहिल्यै नबिर्सने उल्लेख गर्दै उनले टेस्ट यात्रालाई भारी मनले टुंग्याएको बताएका छन्।
३६ वर्षीय शमीले भारतका लागि ६४ वटा टेस्ट खेल्दा २२९ विकेट लिएका छन्। पहिलोपटक टेस्ट जर्सी लगाउँदा देशका लागि केही गर्ने सपना मात्रै रहेको स्मरण गर्दै उनले हरेक विकेट, संघर्ष, चोट र चोटबाट फर्किने प्रयासले आफूलाई धेरै कुरा सिकाएको बताएका छन्। उनका अनुसार टेस्ट क्रिकेट उनका लागि खेलको एउटा स्वरूप मात्र थिएन, जीवनकै विशेष हिस्सा थियो।
शमीले आफ्नो यात्रामा साथ दिएका सहकर्मी खेलाडी, प्रशिक्षक र परिवारका सदस्यलाई धन्यवाद दिएका छन्। सुखदुःखका हरेक क्षणमा साथ र विश्वास कायम राखेका समर्थकप्रति पनि उनले आभार व्यक्त गरेका छन्। आफ्नो प्रतिभामाथि विश्वास गर्दै अघि बढ्ने अवसर दिएको भन्दै उनले भारतीय क्रिकेट नियन्त्रण बोर्ड र क्रिकेट एसोसिएसन अफ बंगाललाई समेत धन्यवाद दिएका छन्।
सन् २०२५ को च्याम्पियन्स ट्रफीपश्चात् उनी भारतीय राष्ट्रिय टोलीबाट बाहिर छन्। टेस्टबाट बिदा लिए पनि उनले सीमित ओभरको क्रिकेट खेल्न भने जारी राख्ने बताएका छन्।
