काठमाडौँ — तिहार, दीपावली, नेपाल संवत् र छठजस्ता पर्वका बेला हुन सक्ने आपराधिक गतिविधि रोक्न नेपाल प्रहरीले देशभर सुरक्षा व्यवस्था कडा बनाएको छ । नागरिकको जीउधनको रक्षा र सहज आवागमन सुनिश्चित गर्न ‘चाडपर्व लक्षित विशेष सुरक्षा योजना, २०८३’ लागू गरिएको छ ।
प्रहरी प्रधान कार्यालय नक्सालका अनुसार सम्भावित जोखिमको विश्लेषण गरेर संवेदनशील क्षेत्रमा थप जनशक्ति खटाइएको छ । बजार क्षेत्र, धार्मिकस्थल, सार्वजनिक यातायातका केन्द्र, सीमा नाका र भीडभाड हुने स्थानलाई विशेष प्राथमिकतामा राखिएको छ ।
प्रहरीका केन्द्रीय प्रवक्ता अबिनारायण काफ्लेका अनुसार चाडपर्वका बेला चोरी, लुटपाट, जुवातास, लागुऔषध र मादक पदार्थको दुरुपयोग, झैझगडा, कालोबजारी, खाद्य पदार्थमा मिसावट र आगलागी प्रमुख चुनौती हुन् । यस्ता गतिविधि नियन्त्रण गर्न नियमित गस्ती, आकस्मिक जाँच र सादा पोसाकमा प्रहरी परिचालन गरिएको छ । निगरानीका लागि सीसीटीभी, शरीरमा जडित क्यामेरा, ड्रोन र तालिमप्राप्त कुकुर प्रयोग गरिनेछ भने तत्काल प्रतिकार्यका लागि द्रुत टोली र विपद् व्यवस्थापनका जनशक्ति तयारी अवस्थामा राखिएका छन् ।
यात्रुको चाप बढ्ने भएकाले सडक सुरक्षा र दुर्घटना न्यूनीकरणलाई पनि प्राथमिकता दिइएको छ । देशभर ४०८ स्थानमा यात्रु सहायता कक्ष स्थापना गरी कम्तीमा एक हजार १६५ प्रहरी खटाइएको छ । अन्तर्राष्ट्रिय सीमा नाकाका १०८ स्थानमा पनि सहायता कक्ष स्थापना गरिएको छ । लामो दूरीका सवारीसाधन चलाउनुअघि चालकको अनुमतिपत्र, मादक पदार्थ तथा लागुऔषध सेवनको अवस्था र सवारीसाधनका कागजात जाँच गरिनेछ भने लामो दूरीमा दुई जना चालक राख्नुपर्ने नियमको कार्यान्वयनमा निगरानी बढाइएको छ ।
यसैबीच, सामाजिक सञ्जालको दुरुपयोग गरी महिलाको चरित्र हत्या गरेको आरोपमा प्रहरीले दुई जनालाई पक्राउ गरेको छ । साइबर ब्यूरोका अनुसार इलामका विकल्प राई र सिन्धुपाल्चोकका सुजन पाण्डे पक्राउ परेका हुन् । राईले टेलिग्राममार्फत र पाण्डेले एक्समार्फत महिलाका तस्बिर तथा भिडियो सार्वजनिक गर्ने धम्की दिएको प्रारम्भिक अनुसन्धानबाट खुलेको छ । उनीहरूलाई क्रमशः ठमेल र तारकेश्वरबाट पक्राउ गरिएको हो । विद्युतीय कारोबार ऐन, २०६३ अन्तर्गत राईलाई पाँच दिन र पाण्डेलाई चार दिनको म्याद थप गरी अनुसन्धान भइरहेको छ ।
