काठमाडौँ । विपद्मा परी बेपत्ता भएका व्यक्तिहरूको विवरण सार्वजनिक गर्दै राष्ट्रिय विपद् जोखिम न्यूनीकरण तथा व्यवस्थापन प्राधिकरणले दाबी, थपघट वा संशोधनका लागि सात दिनको समयसीमा तोकेको छ।
गृह मन्त्रालय मातहतको प्राधिकरणले शनिबार सार्वजनिक सूचना जारी गर्दै अहिलेसम्म २ हजार २ सय ९४ जना नेपाली र १ सय ७१ जना विदेशी नागरिक बेपत्ता रहेको विवरण बाहिर ल्याएको हो। यो सूचना विपद् सम्बन्धी केही नेपाल ऐनलाई संशोधन गर्न बनेको अध्यादेश, २०८३ बमोजिम जारी गरिएको प्राधिकरणले जनाएको छ।
देशका ३२ वटा जिल्ला विपद् जोखिम न्यूनीकरण तथा व्यवस्थापन समितिबाट संकलन भएका विवरणअनुसार सबैभन्दा धेरै बेपत्ता रसुवाका १ हजार ५ सय ३८ जना छन्। त्यसपछि सिन्धुपाल्चोकका २ सय १९, जुम्लाका ६३, कैलाली र सर्लाहीका ५१–५१, बर्दियाका ४४, दाङका ३८, रामेछाप र सिन्धुलीका ३७–३७, काभ्रेपलाञ्चोकका ३५ र ललितपुरका १४ जना रहेका छन्। अन्य जिल्लाका बेपत्ता नागरिक पनि सूचीमा समेटिएका छन्।
विदेशी नागरिकतर्फ नेपालस्थित सात वटा विदेशी नियोग तथा दूतावासमार्फत प्राप्त विवरणमा १ सय ७१ जना बेपत्ता देखिएका छन्। तीमध्ये मलेसिया र युक्रेनका ५४–५४, अस्ट्रेलियाका ३३, रुसका ११, दक्षिण कोरियाका ९, जर्मनीका ८ र इटालीका २ जना नागरिक छन्।
बेपत्ता भनिएका व्यक्ति जीवित भेटिएमा वा फेला परेमा निज आफैं वा एकाघरको परिवारले सात दिनभित्र सम्बन्धित स्थानीय तह, जिल्ला प्रशासन कार्यालय वा प्राधिकरणमा दाबी बुझाउनुपर्नेछ। सार्वजनिक विवरणमा कुनै त्रुटि देखिएमा प्राधिकरणको इमेल तथा मोबाइल नम्बर ९८५१३२०२६९ वा ९८४९२८१०९७ मा जानकारी गराउन सकिने जनाइएको छ। विदेशी नागरिकको विवरण सच्याउन वा बुझ्न परराष्ट्र मन्त्रालयअन्तर्गतको कन्सुलर सेवा विभागमा सम्पर्क गर्न प्राधिकरणले अनुरोध गरेको छ।
