तिहार नजिकिँदै गर्दा पाल्पाका खेतबारी सयपत्री र मखमली फूलले ढकमक्क भएका छन्। पहेँलो फूलले गाउँको सौन्दर्य बढाएको मात्र छैन, धेरै किसान परिवारका लागि आम्दानीको नयाँ बाटो पनि खोलेको छ। चाडपर्वको मौसममा किसानहरू फूल टिप्ने, माला गाँस्ने र बजारसम्म पुर्याउने काममा व्यस्त छन्।
रैनादेवी छहरा गाउँपालिका–२ का इन्दिरा कोइराला र उनका छोरा खिमराज कोइराला अहिले बाँझो जमिनमा लगाएको फूल टिप्नमा लागेका छन्। धर्तीमाता कृषि फार्ममार्फत उनीहरूले दीपावलीलाई लक्षित गरी टेनिस बल जातको फूल रोपेका हुन्। चार रोपनी क्षेत्रफलमा फुलेको फूलले खेतको स्वरूप मात्र बदलेको छैन, परिवारको आम्दानीको सम्भावना पनि फराकिलो बनाएको छ।
फार्मका सञ्चालक खिमराजका अनुसार यस वर्ष फूलखेतीबाट करिब छ लाख रुपैयाँ आम्दानी गर्ने लक्ष्य छ। उत्पादन पाल्पामा मात्र सीमित नराखी छिमेकी जिल्लासम्म पुर्याउने योजना रहेको उनले बताए। तिहारका बेला थोक र खुद्रा दुवै तरिकाले फूल र माला बिक्री गरिनेछ भने उपभोक्ताको सुविधाका लागि घरदैलोमै फूल तथा माला पुर्याउने व्यवस्था पनि मिलाइएको छ।
फूलखेतीको प्राविधिक पक्ष, मलजलको व्यवस्थापन र उत्पादनको रेखदेख खिमराज आफैँ गर्छन् भने आमा इन्दिराले फूलको नियमित स्याहारसुसारको जिम्मेवारी सम्हालेकी छन्। वैदेशिक रोजगारी र अन्य पेसाका कारण खेतीयोग्य जमिन बाँझिँदै गएको अवस्थामा यस्तो जमिनलाई सदुपयोग गरेर आम्दानी गर्न सकिने सम्भावना फूलखेतीले देखाएको इन्दिराको भनाइ छ।
उपभोक्ताको मागअनुसार रूपन्देहीको बुटवल र अर्घाखाँचीको पाणिनीसम्म फूल र माला पठाउने गरिएको छ। बगनासकाली गाउँपालिका–८ का पुष्प व्यवसायी झपिन्द्र बस्यालले १० रोपनी जग्गामा सयपत्री खेती गरेका छन् भने पोखराथोकका श्रवणकुमार श्रेष्ठको बारी पनि फूलैफूलले भरिएको छ। रामपुर, माथागढी, बगनासकाली, रिब्दीकोट र रम्भाका किसानले समेत व्यावसायिक रूपमा फूल उत्पादन गरेर राम्रो आम्दानी गर्न थालेका छन्।
