गैरआवासीय नेपालीहरूको मुख्य लगानी रहेको संयुक्त ऊर्जा लिमिटेडले सेयरधनीलाई नगद लाभांश दिने भएको छ। कम्पनीका अध्यक्ष डा. बद्री केसीको अध्यक्षतामा शुक्रबार काठमाडौंमा बसेको साधारण सभाले चुक्ता पुँजीको ७.५ प्रतिशत नगद लाभांश वितरण गर्ने प्रस्ताव पारित गरेको हो।
कम्पनीले म्याग्दीको रघुगंगा गाउँपालिकामा २१.३ मेगावाट क्षमताको ठूलो खोला जलविद्युत आयोजना सञ्चालन गरिरहेको छ। कम्पनीको सेयर पुँजी एक अर्ब १८ करोड ४० लाख रुपैयाँ छ।
आर्थिक वर्ष २०८२/८३ मा कम्पनीले बिजुली बेचेर ४९ करोड ७२ लाख ७१ हजार रुपैयाँभन्दा बढी आम्दानी गरेको छ। उक्त वर्ष करपछिको खुद मुनाफा १३ करोड ९० लाख ६५ हजार रुपैयाँ पुगेको छ।
लक्ष्यअनुसार उत्पादन भने हुन सकेन। कम्पनीले उक्त वर्ष १० करोड ९ लाख ५ हजार ४१७ युनिट बिजुली उत्पादन गर्ने लक्ष्य राखेकोमा ७ करोड ९२ लाख २ हजार ४३० युनिट मात्र उत्पादन भयो, जुन लक्ष्यको करिब ७८ प्रतिशत हो।
अध्यक्ष केसीका अनुसार विद्युत प्राधिकरणले उत्पादित सबै बिजुली नकिनिदिँदा लक्ष्य पूरा हुन सकेन। प्राधिकरणले सबै बिजुली किनेको भए सोही वर्ष ७० करोड रुपैयाँसम्मको बिजुली बिक्री गर्न सकिने क्षमता रहेको उनको भनाइ छ।
कम्पनीले आइपिओ निष्काशन गर्ने तयारी पनि गरेको छ। जारी पुँजी एक अर्ब ६० करोड रुपैयाँमध्ये १० प्रतिशत ठूलो खोला आयोजनाका प्रभावित तथा स्थानीय बासिन्दा र १६ प्रतिशत सर्वसाधारणका लागि छुट्याइने उल्लेख छ।
