पोखरा — प्रदेश पदक वितरणमा अनियमितता गरेको आरोपमा गण्डकी प्रदेश सरकारले प्रदेश खेलकुद परिषद्का सदस्य सचिव श्रीधर शर्मालाई पदबाट हटाएको छ। बुधबार बसेको मन्त्रिपरिषद् बैठकले गरेको निर्णय शुक्रबार मन्त्रालयमार्फत शर्मालाई औपचारिक रूपमा जानकारी गराइएको हो।
सामाजिक विकास, युवा तथा खेलकुद मन्त्रालयका सचिव डा. शेषनारायण पौडेलका अनुसार बर्खास्तीको पत्र शुक्रबार नै परिषद्मा दर्ता गरिएको छ। परिषद्को काम नरोकियोस् भनेर तत्कालका लागि मन्त्रालयका उपसचिव दीपेन्द्र परियारलाई सदस्य सचिवको जिम्मेवारी दिइएको छ। प्रदेश खेलकुद ऐनअनुसार अर्को व्यवस्था नभएसम्म खेलकुद महाशाखा प्रमुखले नै यो जिम्मेवारी सम्हाल्नेछन्।
पदक वितरणमा व्यापक अनियमितता भएको विवाद सार्वजनिक भएपछि मन्त्रालयले पौडेलकै संयोजकत्वमा तीन सदस्यीय छानबिन समिति बनाएको थियो। समितिले पदक वितरणमा चरम लापरबाही भएको ठहर गर्दै शर्मामाथि कारबाही गर्न सिफारिस गरेको थियो। प्रतिवेदनमा पदक सिफारिस समितिको निर्णयबिनै पदक बाँडिएको र सिफारिस समितिमै रहेका व्यक्ति तथा उनीहरू आबद्ध संस्थालाई पदक दिलाइएको उल्लेख छ।
परिषद्ले सदस्य केशव पाठक, हरि पराजुली र चित्रबहादुर थापालगायत व्यक्ति र संस्थालाई पदक दिएको थियो। प्रतिवेदनका आधारमा सरकारले शर्मासँग स्पष्टीकरण मागेको थियो। जवाफ चित्तबुझ्दो नभएपछि मन्त्रिपरिषद्ले उनलाई हटाउने निर्णय गरेको हो।
कारबाही रोक्न शर्माले उच्च अदालत पोखरामा रिट दायर गरेका थिए। परिषद् स्वायत्त संस्था भएकाले सरकारले आफूमाथि कारबाही गर्न नपाउने उनको जिकिर थियो। तर अदालतले सरकारको प्रक्रियामा अन्तरिम आदेश नदिएपछि बर्खास्तीको बाटो खुलेको मन्त्रालयले जनाएको छ।
