स्याङ्जा, २१ कात्तिक — जिल्लाका तीन ठाउँमा बन्न लागेका आयुर्वेद औषधालयका भवन सम्झौता भएको छ वर्ष बितिसक्दा पनि पूरा भएका छैनन्। भवन नबन्दा स्थानीयले पाउनुपर्ने आयुर्वेदिक सेवा अझै भाडाका घरबाट सीमित रूपमा मात्रै दिइँदै आएको छ।
आँधीखोला गाउँपालिका–५ सेतिदोभान, अर्जुनचौपारी गाउँपालिका–५ आरुचौर र वालिङ नगरपालिका–१ धनुबाँसेमा निर्माणाधीन भवन अलपत्र अवस्थामा छन्। सेतिदोभान र आरुचौरका भवन दुई वर्षभित्र सक्नुपर्ने सम्झौता भए पनि काम आधा हाराहारी मात्रै भएको छ। धनुबाँसेको भवन डेढ वर्षमा सक्ने गरी ठेक्का लागेको थियो, तर म्याद सकिँदासमेत आधा काम मात्रै भएको छ।
सेतिदोभान र आरुचौरका लागि भ्याली/बाबुरत्न जेभी ललितपुरले २०७७ फागुन ११ गते सम्झौता गरेको थियो। सेतिदोभानको भवन सात करोड ८२ लाख ७१ हजार पाँच सय ६६ रुपैयाँ १३ पैसामा र आरुचौरको भवन दुई करोड २९ लाख ७८ हजार आठ सय ७६ रुपैयाँ ४३ पैसामा बन्ने गरी सम्झौता भएको इन्जिनियर योगेन्द्र बास्ताकोटीले जानकारी दिए। सेतिदोभानमा ६५ प्रतिशत र आरुचौरमा ५० प्रतिशत मात्रै भौतिक प्रगति भएको छ, दुवैको वित्तीय प्रगति भने ४४ प्रतिशत छ।
धनुबाँसेको भवन एक करोड ७९ लाख १२ हजार चार सय ७० रुपैयाँ तीन पैसामा बनाउने गरी सेफ इन्जिनियरिङ बिल्डर्स प्रालि चितवनले २०७७ फागुन १९ गते सम्झौता गरेको थियो। इन्जिनियर लक्ष्मण लम्सालका अनुसार त्यहाँ पछिल्लो डेढ वर्षदेखि निर्माण कम्पनीले कामै गरेको छैन। पटकपटक पत्राचार गर्दा पनि प्रगति नभएपछि कार्यालयले ठेक्का तोड्ने सूचना जारी गरेको उनले बताए।
धनुबाँसे आयुर्वेद औषधालयका प्रमुख हरिप्रसाद अर्यालका अनुसार औषधालयले भाडाको घरबाट सामान्य स्वास्थ्य परीक्षण, औषधोपचार र परामर्श सेवा मात्रै दिँदै आएको छ। भवन र पूर्वाधार नहुँदा मेडिकल योग, शिरोधारा तथा आयुर्वेदिक औषधि निर्माणजस्ता सेवा सञ्चालन गर्न नसकिएको उनको भनाइ छ।
