काठमाडौँ । तोकिएको समय र मापदण्डअनुसार काम नगरेको आरोपमा २० वटा निर्माण व्यवसायी तथा आपूर्तिकर्ता कम्पनी कालोसूचीमा परेका छन्। सार्वजनिक खरिद अनुगमन कार्यालयले ती कम्पनीहरूमाथि कारबाही गर्दै शनिबार सूचना सार्वजनिक गरेको हो।
कार्यालयको कात्तिक २० गतेको निर्णयले सार्वजनिक खरिद ऐन, २०६३ को दफा ६३ को उपदफा (१) बमोजिम यस्तो कारबाही भएको हो। निर्णयअनुसार सम्बन्धित कम्पनीहरू एक वर्षदेखि दुई वर्षसम्म कालोसूचीमा रहनेछन्।
कालोसूचीमा रहँदासम्म ती कम्पनीहरूले कुनै पनि सरकारी वा सार्वजनिक निकायको खरिद प्रक्रियामा भाग लिन पाउने छैनन्। विभिन्न सार्वजनिक निकायबाट प्राप्त सिफारिसका आधारमा कार्यालयले यो कदम चालेको जनाएको छ।
सार्वजनिक निर्माण र आपूर्ति काममा गुणस्तर तथा पारदर्शिता कायम गर्न कालोसूचीको व्यवस्था गरिएको कार्यालयले जनाएको छ। समयमै र गुणस्तरीय काम नगर्ने व्यवसायीलाई सार्वजनिक खरिदबाट निश्चित अवधिसम्म बाहिर राख्ने कानुनी व्यवस्था रहेको छ।
खरिद प्रक्रियामा लापरबाही गर्ने व्यवसायीमाथि निगरानी कडा पारिएको र आगामी दिनमा पनि यस्तो कारबाही जारी रहने कार्यालयको भनाइ छ।
