काठमाडौं । नेपाली कांग्रेसका नेता प्रकाशमान सिंहले पार्टी संगठन बलियो बनाउने बाटो नेताको वरिपरि घुम्ने नभई जनताको बीचमा गएर काम गर्ने भएको बताएका छन्।
शनिबार काठमाडौंमा भएको कांग्रेस जिल्ला कार्यसमितिको १५औं नियमित अधिवेशनमा बोल्दै सिंहले राजधानीमा बसेर जिल्लाको राजनीति चलाउने चलनले पार्टीलाई फाइदा नगर्ने बताए। जिल्लाको जिम्मेवारी जिल्लामै बसेर काम गर्ने कार्यकर्तालाई दिनुपर्ने उनको भनाइ थियो।
सिंहले स्थानीय तहमा दिनरात खटिने कार्यकर्ता नै संगठनको जग भएको उल्लेख गरे। त्यस्ता कार्यकर्तालाई पार्टीको मूलधारमा ल्याउनुपर्ने र उनीहरूको कामको कदर गर्नुपर्ने उनले बताए।
इतिहासको चर्चा मात्र गरेर नपुग्ने भन्दै उनले आजका सवालमा पार्टीको धारणा प्रस्ट हुनुपर्ने बताए। जनताको भावना र आवश्यकता बुझेर अघि बढ्नुपर्ने उनको जोड थियो।
जनता धेरै अघि बढिसकेको भन्दै सिंहले नेताहरूलाई पनि जनतासँगै हिँड्न आग्रह गरे। सबैले आ–आफ्नो ठाउँको जिम्मेवारी लिएर संगठन निर्माणमा लाग्नुपर्ने उनले बताए।
