ललितपुर — नेपाली कांग्रेसका सभापति गगनकुमार थापाले नेपाली समाजले घृणा र नकारात्मकताको थप बोझ थेग्न नसक्ने बताएका छन्। नकारात्मकताभन्दा सकारात्मक सोच र ऊर्जालाई बढाएर मात्र समाज अघि बढ्न सक्ने उनको धारणा छ।
नेपाल संवत् ११४७ का अवसरमा नागबहाल टोल सुधार समितिले शनिबार यहाँ आयोजना गरेको शुभकामना आदानप्रदान कार्यक्रममा बोल्दै थापाले आफ्नो मौलिकता, परम्परा र सांस्कृतिक सम्पदाको संरक्षण गर्दै आधुनिकतालाई पनि अँगालेर अघि बढ्नुपर्ने बताए।
पुराना सम्पदा जोगाउने र नयाँ विकासलाई ठाउँ दिने कामलाई सन्तुलित ढंगले सँगै अघि बढाउनुपर्नेमा उनले जोड दिए। नयाँपन भित्र्याउने नाममा कतिपय ठाउँमा पुराना संरचना नै भत्काइने गरेको र सम्पदा संरक्षणकै नाममा नयाँ विकासलाई ठाउँ नदिइने गरेको उल्लेख गर्दै उनले दुवै प्रवृत्तिबीच सन्तुलन खोज्नुपर्ने बताए।
समाजमा कायम प्रेम, सद्भाव, विश्वास र भाइचाराजस्ता अमूर्त सम्बन्ध भौतिक सम्पदाभन्दा बढी महत्त्वपूर्ण हुने उनको भनाइ थियो। टोल सुधार समितिजस्ता स्थानीय संस्थाले सामाजिक सम्बन्ध र सामुदायिक एकता मजबुत बनाउन ठूलो भूमिका खेल्ने उनले बताए।
थापाले समाजलाई आफ्नो जरा, टोल, समुदाय, चाडपर्व र सामाजिक सम्बन्धसँग पुनः जोड्नुपर्ने आवश्यकता पनि औंल्याए। प्रविधि र डिजिटल संसारमा मात्र सीमित नभई मानिसबीच प्रत्यक्ष भेटघाट, आपसी संवाद र सामाजिक सम्बन्धलाई प्राथमिकता दिनुपर्ने उनको भनाइ थियो। स्थानीयस्तरमा हुने शुभकामना आदानप्रदानजस्ता कार्यक्रम सामान्य देखिए पनि सामाजिक एकता र सम्बन्ध विस्तारका दृष्टिले निकै महत्त्वपूर्ण हुने उनले बताए।
