काठमाडौं — मुम्बई इन्डियन्सका कप्तान हार्दिक पाण्ड्या पञ्जाब किंग्समा जाने भएका छन् भने पञ्जाबका बायाँहाते तीव्र गतिका बलर अर्शदीप सिंह मुम्बईको जर्सीमा देखिने भएका छन्। दुई फ्रेन्चाइजबीचको यो साटफेर अन्तिम चरणमा पुगेको छ।
क्रिकइन्फोका अनुसार मुम्बई र पञ्जाब दुवैले साटफेरका लागि आईपीएलसमक्ष चासो जनाइसकेका छन्। दुवै खेलाडीको लिखित सहमति र फ्रेन्चाइजबीचको अन्तिम छलफलपछि आईपीएलबाट कारोबार स्वीकृत हुने प्रक्रिया अघि बढ्नेछ, जुन आगामी २४ घण्टाभित्र टुङ्गिने अपेक्षा छ।
हार्दिक र मुम्बईबीचको दूरी सन् २०२६ को आईपीएलको उत्तरार्धदेखि बढ्दै गएको थियो। हार्दिकले टोली छाड्न चाहेको बताएपछि मुम्बईले अन्य फ्रेन्चाइजसँग साटफेरको सम्भावना खोजेको थियो। रोयल च्यालेन्जर्स बेंगलुरुबाहेक लगभग सबै टोलीसँग छलफल भएको बताइएको छ।
गत सिजन नवौँ स्थानमा सीमित भएपछि मुम्बईलाई जसप्रित बुमराहलाई साथ दिन सक्ने भरपर्दो तीव्र गतिका बलरको खाँचो देखिएको थियो। त्यही आवश्यकताले अर्शदीपलाई मुम्बईको प्राथमिकतामा पुर्याएको हो।
अर्शदीपका लागि यो नयाँ अध्याय हुनेछ। उनले सन् २०१९ मा पञ्जाबबाटै आईपीएलमा पाइला टेकेका थिए र त्यसयता पञ्जाबका लागि ९६ खेलमा १११ विकेट लिएका छन्। उनको बलिङ इकोनोमी ९.१८ छ।
हार्दिकका लागि यो तीन वर्षमा दोस्रो पटक साटफेरमार्फत टोली फेर्ने तयारी हो। सन् २०२४ को सिजनअघि मुम्बईले उनलाई गुजरात टाइटन्सबाट ल्याएर कप्तान बनाएको थियो। रोहितको नेतृत्वमा मुम्बईले पाँच पटक उपाधि जितेको थियो। हार्दिकको कप्तानीमा भने टोलीले २०२४ मा पुछारमा रहँदै सिजन सकायो, २०२५ मा प्लेअफमा पुग्यो र २०२६ मा फेरि लय गुमायो। सन् २०२४ यता उनको कप्तानीमा मुम्बईले ३९ खेलमध्ये १५ मा मात्र जित हात पारेको छ।
यसैबीच, मुम्बईले आईपीएल २०२७ अघि प्रशिक्षक टोलीमा पनि हेरफेर गरेको छ — कायरोन पोलार्ड मुख्य प्रशिक्षक बनेका छन् भने रोबिन उथप्पा ब्याटिङ प्रशिक्षक, मिचेल म्याक्लेनघन बलिङ प्रशिक्षक र टी दिलिप फिल्डिङ प्रशिक्षकका रूपमा टोलीमा आएका छन्।
