तिहार सकिएपछि पनि सेयर किन्दा लाभांश पाउने अवस्था अझै १७ वटा सूचीकृत कम्पनीमा रहेको छ। यी कम्पनीले लाभांश घोषणा गरिसके पनि बुक क्लोजको मिति तय गरेका छैनन्, त्यसैले अहिले सेयर किन्ने लगानीकर्ताले पनि घोषित लाभांश पाउनेछन्।
सूचीमा ३ वटा वाणिज्य बैंक, २ वटा विकास बैंक, उत्पादन तथा प्रशोधन समूहको १, जलविद्युत्का ६ र लघुवित्तका ५ कम्पनी छन्। आर्थिक वर्ष सकिएको ६ महिनाभित्र साधारणसभा सम्पन्न गर्नुपर्ने नियम छ, र कम्पनीहरू अहिले धमाधम साधारणसभाको तयारीमा छन्।
नगद लाभांश साधारणसभा सकिएलगत्तै सेयरधनीको बैंक खातामा जम्मा हुन थाल्छ। बोनस सेयर भने धितोपत्र बोर्डमा दर्ता भएपछि मात्र डिम्याट खातामा आउँछ, त्यसैले त्यसमा केही बढी समय लाग्छ। बोनस सेयर पाउँदा सेयर संख्या बढेअनुसार बुक क्लोजका दिन मूल्य पनि समायोजन हुन्छ।
घोषित लाभांशमा स्ट्यान्डर्ड चार्टर्ड बैंकको १६ प्रतिशत नगद र एनएमबी बैंकको ७ प्रतिशत नगद अगाडि छन्। युनिलिभर नेपालले प्रतिकित्ता १,५४० रुपैयाँ नगद दिने भएको छ। छिमेक लघुवित्तको कुल लाभांश २५ प्रतिशत छ भने कुथेली बुखरी स्मल हाइड्रोपावरको १८.९४७ प्रतिशत पुगेको छ।
अन्य कम्पनीमा लक्ष्मी सनराइज बैंकको कुल ५.२६ प्रतिशत, महालक्ष्मी विकास बैंकको ७.४८ प्रतिशत, मितेरी डेभलपमेन्ट बैंकको ११ प्रतिशत, अपी पावरको ५.२६३ प्रतिशत, मकर जितुमाया सुरीको १३.६८४ प्रतिशत, सिक्लेस हाइड्रोपावरको १३.३७५ प्रतिशत, मिड सोलु हाइड्रोपावरको १५.७८९ प्रतिशत, युनाइटेड इदी मर्दीको ५.२६३ प्रतिशत, आरएसडीसी लघुवित्तको ९.४० प्रतिशत, हिमालयन लघुवित्तको ५ प्रतिशत, फस्र्ट माइक्रोफाइनान्सको ११.०५२ प्रतिशत र ग्लोबल आईएमई लघुवित्तको ९.५० प्रतिशत लाभांश घोषणा भएको छ।
