चितवनको सौराहामा पाँचतारे डिलक्स होटल रोयल टुलिप चितवन सञ्चालन गरिरहेको केटिएम हस्पिटालिटी तेस्रो वर्षमा प्रवेश गरेको छ। कम्पनीले शुक्रबार काठमाडौंमा तेस्रो वार्षिक साधारणसभा सम्पन्न गरेको हो।
सभामा अध्यक्ष रामेश्वर शाहले होटल पूर्ण रूपमा सञ्चालनमा आएपछि व्यवसायले गति लिएको बताए। छोटो समयमै आन्तरिक तथा बाह्य पर्यटकको आगमन राम्रो रहेको र एक वर्षभित्रै ऋणको साँवा र ब्याज तिर्न थालिएको उनले जानकारी दिए। चालु आर्थिक वर्षको पहिलो त्रैमासको दायित्व असोजमै भुक्तानी गरिएको छ।
होटलले पर्यटन विभागबाट पाँचतारे डिलक्सको मान्यता पाएको छ। परीक्षणकालको सुरुआतमै चितवनको खाद्य प्रविधि तथा गुण नियन्त्रण डिभिजन कार्यालयबाट तीनतारा (क) अर्थात् अतिउत्तम खाद्य स्वच्छता वर्गीकरण पनि प्राप्त भएको छ। यो वर्गीकरण पाउने चितवनको पहिलो पाँचतारे डिलक्स होटल भएको कम्पनीको दाबी छ।
यसैबीच, कम्पनीले सर्वसाधारणका लागि प्राथमिक सेयर निष्कासनको तयारी अघि बढाएको छ। प्रतिकित्ता १०० रुपैयाँ अंकित मूल्यका १५ लाख ५० हजार कित्ता सेयर निष्कासन गर्न नेपाल धितोपत्र बोर्डमा प्रक्रिया अघि बढाइएको छ र निवेदन स्वीकृतिको चरणमा छ। अनुमति पाएपछि कुल १५ करोड ५० लाख रुपैयाँबराबरको आइपिओ जारी हुनेछ।
राप्ती नदी नजिकै जनकौली र कुमरोज सामुदायिक वनको छेउमा रहेको रिसोर्टमा ६५ वटा आधुनिक कोठा छन्। त्यहाँ रेस्टुरेन्ट, स्विमिङ पुल, जिम, हेल्थ क्लब र हेलिप्याडका साथै रिभल्भिङ रेस्टुरेन्ट पनि छ। निर्माण र सजावटमा काठका फर्निचर, ढुंगा, टायल, जुटका गलैंचा र काठका पेन्टिङजस्ता स्थानीय सामग्री प्रयोग गरिएको छ। होटल अन्तर्राष्ट्रिय लुभ्र होटल्स ग्रुपअन्तर्गतको रोयल टुलिप ब्रान्डसँगको व्यवस्थापकीय सम्झौतामा सञ्चालन भइरहेको छ। सन् २०२५ जुलाईदेखि सफ्ट ओपनिङ सुरु भएको रिसोर्ट अहिले पूर्ण रूपमा सञ्चालनमा छ।
