आइतबार बिहान मध्य जापानमा गएको ५.७ म्याग्निच्युडको भूकम्पमा कम्तीमा २४ जना घाइते भएका छन्। टोकियोको पश्चिमतर्फ रहेको सिजुओका प्रिफेक्चरमा स्थानीय समयअनुसार बिहान १ बजेर ४ मिनेटमा भूकम्प गएको जापान मौसम विज्ञान एजेन्सीले जनाएको छ। भूकम्पपछि सुनामीको कुनै चेतावनी जारी गरिएको छैन।
भूकम्पको धक्काले भवनका झ्यालका सिसा फुटेका छन् भने पसलका दराज र ¥याकमा राखिएका सामान खसेका छन्। आइची क्षेत्रमा सामान्य चोटपटक लागेका १६ जनाबारे जानकारी आएको छ भने छिमेकी सिजुओका क्षेत्रमा कम्तीमा तीन महिला उपचारका लागि अस्पताल पुगेका छन्। तीमध्ये ९० वर्षीया एक महिला ओछ्यानबाट खस्दा काँधमा चोट लागेको थियो।
आइचीको तोयोहासी सहरमा एउटा कार प्रदर्शनी कक्षका झ्यालका सिसा फुटेका छन् भने टोयोटा सहरको ठूलो पुस्तक पसलमा दराजबाट किताब खसेका छन्। भूकम्पका कारण क्षेत्रीय रेल सेवासहित सिन्कान्सेन बुलेट रेलको सञ्चालनमा ढिलाइ र अवरोध भएको छ। भूकम्पको धक्का पश्चिममा ओसाकासम्म महसुस गरिएको थियो, जहाँ एक विदेशी नागरिक आत्तिएर आफ्नो अपार्टमेन्टको दोस्रो तलाबाट खसेपछि अस्पताल भर्ना भएका छन्।
यसैबीच, सोही बिहान कुमामोतो क्षेत्रमा ४.३ म्याग्निच्युडको अर्को भूकम्प गएको छ। उक्त भूकम्पबाट कुनै गम्भीर क्षति वा मानवीय चोटपटक भएको खबर छैन। जापान प्रशान्त महासागरको ‘रिङ अफ फायर’ क्षेत्रमा पर्ने भएकाले यहाँ हरेक वर्ष सयौँ भूकम्प जाने गर्छन्। सन् २०११ मा गएको नौ म्याग्निच्युडको भूकम्पपछि आएको सुनामीमा परी करिब १८ हजार ५०० जनाको मृत्यु वा बेपत्ता भएका थिए।
