काठमाडौं । आगामी मंसिर मसान्तसम्ममा नेप्सेमा सूचीकृत आठ कम्पनीका विभिन्न समूहका सेयरधनीमाथि लागेको लकइन अवधि समाप्त हुँदैछ। सामूहिक लगानी कोष, संस्थापक सेयरधनी, कर्मचारी र आयोजनाबाट प्रभावित स्थानीय बासिन्दाले राखेका सेयरमा यो बन्देज हट्नेछ।
लकइन खुल्नासाथ ती सेयर बजार मूल्यमै किनबेच गर्न पाइनेछ। यसले बजारमा सेयरको आपूर्ति बढाउने भएकाले सम्बन्धित कम्पनीका सेयर मूल्यमा दबाब पर्न सक्ने विश्लेषण गरिएको छ। नियमअनुसार लकइन सकिनु एक महिनाअघि नै कम्पनीहरूले सार्वजनिक सूचना प्रकाशित गरेर लगानीकर्तालाई जानकारी गराउनुपर्छ।
साधारण सेयर बाँडफाँट भएको मितिदेखि सामूहिक लगानी कोषका सेयरमा ६ महिना र संस्थापक तथा स्थानीयका सेयरमा तीन वर्षसम्म लकइन लागू हुन्छ।
याम्बलिङ हाइड्रोपावरको सामूहिक लगानी कोषले राखेको एक लाख पाँच हजार कित्ता सेयरमा कात्तिक २९ गते लकइन सकिँदैछ। भिजन लुम्बिनी ऊर्जामा संस्थापकका एक करोड ५३ लाख, प्रभावित स्थानीयका १४ लाख २४ हजार पाँच सय ९० र कर्मचारीका ३८ हजार दुई सय ५० गरी कूल एक करोड ६७ लाख ६२ हजार आठ सय ४० कित्तामा मंसिर ४ गते लकइन हट्नेछ।
टक्सार पिखुवाखोला हाइड्रोपावरमा सामूहिक लगानी कोषको एक लाख ४९ हजार ३२ कित्तामा मंसिर ५, स्नो रिभर्समा ४६ हजार आठ सय ७५ कित्तामा मंसिर ११ गते लकइन सकिनेछ। मुक्तिनाथ कृषि कम्पनीमा संस्थापक र कर्मचारीका गरी ६० लाख ९३ हजार तीन सय ६० कित्तामा मंसिर १८, नेपाल वेयरहाउजिङ कम्पनीमा ५५ लाख २७ हजार पाँच सय कित्तामा मंसिर १९ गते लकइन खुल्नेछ। कालंगा हाइड्रोपावरको एक लाख ७५ हजार कित्तामा मंसिर २६ र सानीगढ हाइड्रोको दुई लाख ८५ हजार कित्तामा मंसिर २९ गते लकइन अवधि समाप्त हुँदैछ।
