पोखरा — पोखरा महानगरपालिकाले पुष्प व्यापार मेलामा सबैभन्दा धेरै क्षेत्रफलमा सयपत्री खेती गर्ने किसानलाई सम्मान गरेको छ। पोखरा रङ्गशालामा जारी मेलाको तेस्रो सयपत्री फूल मेलामा आइतबार पोखरा–१३ का किसान नरेन्द्रप्रसाद अधिकारीलाई नगद १० हजार रुपैयाँ र सम्मानपत्र प्रदान गरियो। अधिकारीले करिब १० रोपनी जग्गामा सयपत्री खेती गर्दै आएका छन्।
सम्मान उपप्रमुख मञ्जुदेवी गुरुङ र आर्थिक विकास महाशाखा प्रमुख मनहर कडरियाले संयुक्त रूपमा प्रदान गरेका थिए। मेलामा करिब तीन रोपनीमा फूलखेती गर्ने सोवितबहादुर अधिकारी दोस्रो भए भने नन्दकली घर्ती मगर तेस्रो भइन्। दोस्रोलाई सात हजार र तेस्रोलाई पाँच हजार रुपैयाँ पुरस्कार दिइयो।
मेलामा माला बुन्ने प्रतियोगिता र उत्कृष्ट फूल स्टलको प्रदर्शनी पनि भयो। दुवै विधामा रमेशकुमार श्रेष्ठ उत्कृष्ट ठहरिए। उनको स्टलमा ‘टेनिस बल’ नामको नयाँ जातको सयपत्री पनि राखिएको थियो।
उपप्रमुख गुरुङले किसानको मिहिनेतलाई प्रोत्साहन गर्दै पुष्पखेती विस्तार र स्थानीय उत्पादनको बजारीकरणमा सहयोग गर्ने उद्देश्यले मेला आयोजना गरिएको बताइन्। यस वर्ष तिहारका लागि स्थानीय उत्पादनको सयपत्रीको बिक्री राम्रो भइरहेको महाशाखा प्रमुख कडरियाले जानकारी दिए। आइतबार बिहानदेखि साँझसम्म फूल किन्ने उपभोक्ताको भीड लागेको थियो।
महानगरले कात्तिक २२ गतेदेखि सयपत्री फूलको मूल्य प्रतिकेजी ५०० र प्रतिमाला २०० रुपैयाँ तोकेको छ। मेलामा पनि सोही मूल्यमा कारोबार भएको छ। तिहारलाई लक्षित गरी महानगरले १७ वटा बिक्री केन्द्र तोकेको छ। स्थानीय उत्पादनको प्रवर्द्धन र वातावरण संरक्षणका लागि प्लास्टिकका फूलमाला र फूलगुच्छाको बिक्री, वितरण, भण्डारण तथा प्रयोग नगर्न महानगरले आग्रह गर्दै बजार अनुगमन गरिरहेको छ।
