बाँके — नेपालगन्ज बजारसँग जोडिएको जानकी गाउँपालिका–३ कोरियनपुरमा रहेका दुई विद्युत् पसलमा आइतबार भीषण आगलागी भएको छ। आगलागीबाट कम्तीमा तीन करोड रुपैयाँबराबरको क्षति भएको प्रारम्भिक अनुमान छ।
जिल्ला प्रहरी कार्यालय बाँकेका प्रहरी नायब उपरीक्षक प्रतितसिंह राठौरका अनुसार जय हनुमान ट्रेड एण्ड सप्लायर्स र लक्ष्मी बिजुली भण्डारमा आगो लागेको हो। जेएस स्कुल नजिकै रहेका ती पसलमा विद्युतीय अनियमितताका कारण आगलागी भएको प्रहरीले जनाएको छ।
आगो नियन्त्रणमा ल्याउन चारवटा दमकल प्रयोग गरियो र करिब तीन घण्टापछि आगो नियन्त्रणमा आयो। पसलमा रहेका विद्युतीय सामान जलेर नष्ट भएका छन्। क्षतिको पूर्ण विवरण अझै आइनसकेको प्रहरीले जनाएको छ।
स्थानीयवासी लक्ष्मीपूजामा व्यस्त रहेका बेला आगलागी भएको थियो। चाडपर्वको समयमा भएको यो घटनाले स्थानीय व्यापारीमा त्रास फैलिएको छ।
