अमेरिकाको मध्यस्थतामा रुस र युक्रेनबीच आगामी साता नयाँ चरणको शान्तिवार्ता हुने तयारी भइरहेका बेला रुसी आक्रमण झन् तीव्र बनेको छ। वार्ताको तयारीसँगै रुसी राष्ट्रपति भ्लादिमिर पुटिनले युक्रेनमाथि सैन्य र आर्थिक दबाब बढाएको विश्लेषकहरूको भनाइ छ।

विशेषज्ञहरूले यस वर्षको जाडोमा युक्रेनले अघिल्ला वर्षहरूभन्दा गम्भीर मानवीय संकट भोग्नुपर्ने चेतावनी दिएका छन्। रुसले ऊर्जा उत्पादन र वितरण प्रणालीलाई निशाना बनाएका कारण लाखौँ मानिस विद्युत्, खानेपानी र घर तताउने सुविधाबाट वञ्चित हुन सक्ने अवस्था बनेको छ।

लन्डनस्थित थिंकट्यांक न्यु यूरेसियन स्ट्राटेजिज सेन्टरका जोन लफका अनुसार रुसी हवाई आक्रमण अब युक्रेनको अर्थतन्त्र ध्वस्त पार्ने उद्देश्यबाट निर्देशित छ। उनको भनाइमा पुटिनले डोनबासमा युद्ध जित्न नसकिने निष्कर्ष निकालेर अर्थतन्त्र नै ध्वस्त पारेर युद्ध जित्ने बाटो रोजेका छन्।

द्वन्द्व अनुगमन गर्ने संस्था एसीएलईडीका तथ्यांकअनुसार सन् २०२६ मा अहिलेसम्म रुसी आक्रमणबाट दुई हजार सात सयभन्दा बढी युक्रेनी सर्वसाधारणको मृत्यु भइसकेको छ। यो युद्ध सुरु भएयताका सुरुवाती महिनापछिको सबैभन्दा उच्च स्तर हो। जनवरीमा तीन हजार ६५० रहेको मासिक आक्रमणको संख्या अक्टोबरसम्म आइपुग्दा पाँच हजार ५३२ पुगेको छ।

युक्रेनले पनि रुसी भूमिभित्र आक्रमण बढाएको छ। अक्टोबरमा मात्रै युक्रेनले रुसभित्र दुई हजार ३०२ आक्रमण गरेको तथ्यांक छ। युक्रेनको रक्षा मन्त्रालयका अनुसार गत महिना युक्रेनी सेनाले हतियार उत्पादनमा संलग्न कम्तीमा सात रुसी उद्योग, तीन सैन्य विमानस्थल र महत्त्वपूर्ण राडार तथा सैन्य सञ्चार केन्द्रलाई निशाना बनाएको थियो।

रुसले कृष्णसागरका निर्यात संरचना, डेन्युब नदीका बन्दरगाह, औद्योगिक गोदाम, रेलवे पूर्वाधार र इस्पात उद्योगलाई नियमित रूपमा निशाना बनाइरहेको छ। गत सोमबार जापोरिजियास्थित विद्यालय भवनमा भएको बम आक्रमणमा कम्तीमा ५५ नागरिकको मृत्यु भयो। उक्त विद्यालयलाई आश्रयस्थल तथा मानवीय सहायता केन्द्रका रूपमा प्रयोग गरिएको थियो। क्रिभी रिह र जापोरिजियाका प्रमुख इस्पात उद्योगहरू अगस्टदेखि अक्टोबरबीचका क्षेप्यास्त्र आक्रमणपछि बन्द भएका छन्।

ऊर्जा संकट नै सबैभन्दा गम्भीर प्रभाव हो। धेरै ऊर्जा केन्द्र मर्मत गरेर पुनः सञ्चालन गर्न नसकिने अवस्थामा पुगेका छन्। द्निप्रोपेत्रोभ्स्क क्षेत्रको विद्युत् ग्रिडमा भएको आक्रमणपछि ६ लाखभन्दा बढी मानिस विद्युत्विहीन भएका छन्। राजधानी किभमा शनिबारसम्म करिब ४० प्रतिशत भवनमा ताप सुविधा थिएन। यस वर्षको पहिलो हिमपातसमेत सुरु भइसकेको छ।

अन्तर्राष्ट्रिय उद्धार समितिको नयाँ प्रतिवेदनले दक्षिणी र पूर्वी युक्रेनका सर्वसाधारण आर्थिक संकटका कारण घर छाड्न वा जोखिमपूर्ण काम गर्न बाध्य भएको देखाएको छ। माइकोलाइभ क्षेत्रको सर्वेक्षणमा सहभागीमध्ये ९१ प्रतिशत परिवारले तत्काल आर्थिक सहायता आवश्यक रहेको बताएका छन्।