सुर्खेत — चाडपर्वको समयमा जुवातास नियन्त्रण गर्न प्रहरीले चलाएको रातभरको कारबाहीमा सुर्खेतमा ५५ जना पक्राउ परेका छन्। जिल्लाका आधा दर्जन स्थानमा एकैपटक छापा मारिएको थियो।
जिल्ला प्रहरी कार्यालय सुर्खेतका प्रमुख प्रहरी उपरीक्षक ठाकुरप्रसाद पोखरेलका अनुसार कारबाहीमा ५२ जना प्रहरी खटिएका थिए। पक्राउ परेकाहरूको साथबाट ११ लाख रुपैयाँभन्दा बढी नगद फेला परेको प्रहरीले जनाएको छ।
सोमबार बिहान करिब पौने ३ बजे वीरेन्द्रनगर नगरपालिका–३, गण्डकी लाइनस्थित पदम चौलागाईंको घरमा छापा मार्दा त्यहाँ जुवातास खेलिरहेका आठ जना नियन्त्रणमा लिइए। उनीहरूको साथबाट तीन लाख ७७ हजार आठ सय ५० रुपैयाँ बरामद भएको छ। गोप्य सूचनाका आधारमा प्रहरी टोली त्यहाँ पुगेको थियो।
उक्त छापामा कर्णाली प्रदेश प्रहरी कार्यालय, कर्णाली प्रदेश प्रहरी गण र जिल्ला प्रहरी कार्यालयको संयुक्त टोली सहभागी थियो। प्रदेश प्रहरी कार्यालयबाट प्रहरी निरीक्षक किसमत बुढामगरको कमान्डमा १६ जना, प्रदेश प्रहरी गणबाट प्रहरी निरीक्षक हिमाल थापामगरको कमान्डमा २१ जना र जिल्ला प्रहरी कार्यालयबाट प्रहरी निरीक्षक जितेन्द्र कठायतको कमान्डमा १५ जना प्रहरी खटिएका थिए।
पक्राउ परेका आठ जनाको नाम प्रहरीले सार्वजनिक गरेको छैन। उनीहरूको विवरण संकलन भइरहेको र केही समयपछि सार्वजनिक गरिने प्रहरीले जनाएको छ। पक्राउ परेकाहरूलाई जिल्ला प्रहरी कार्यालय सुर्खेतमा राखिएको छ। एकै रात ठूलो संख्यामा मानिस पक्राउ परेपछि हिरासत कक्षसमेत भरिएको प्रहरीले जनाएको छ।
