दीपावलीको रात ठूलो मात्रामा आतसबाजी भएपछि सोमबार बिहान भारतको राजधानी दिल्लीको हावा स्वास्थ्यका लागि खतरनाक तहमा पुगेको छ। बिहानैदेखि सहरका विभिन्न भागमा बाक्लो हुस्सु र धुवाँले ढाकिएको थियो भने दृश्यता निकै कम भएको थियो।
भारतको केन्द्रीय प्रदूषण नियन्त्रण बोर्डका अनुसार दिल्लीको पटपडगञ्ज क्षेत्रमा वायु गुणस्तर सूचकांक ४१८ पुगेको थियो। आईटीओमा ४०६, राजीव चोकमा ३८१ र साउथ एक्सटेन्सन आसपास ३६० मापन गरिएको थियो। सूचकांक जति बढी हुन्छ, हावा त्यति नै प्रदूषित र स्वास्थ्यका लागि जोखिमपूर्ण मानिन्छ।
उत्तर प्रदेशका नोएडा, गाजियाबाद, कानपुर र वाराणसीसहित १० सहरको हावा पनि सोमबार खतरनाक अवस्थामा पुगेको थियो। बिहान ७ बजे प्रयागराज, गोरखपुर र लखनउमा सूचकांक ५०० नाघेको थियो। प्रदेशका १५ भन्दा बढी सहरमा बाक्लो हुस्सु लागेको थियो भने रातिको तापक्रम १५ डिग्री सेल्सियसभन्दा तल झरेको छ।
मध्यप्रदेशमा पनि आतसबाजीका कारण हावा बिग्रिएको छ। इन्दौरमा नोभेम्बर ८ को राति ११ बजेर ११ मिनेटमा सूचकांक ३२० पुगेको थियो, जसलाई अत्यन्तै खतरनाक श्रेणीमा राखिएको छ। भोपाल र इन्दौरसहित १४ सहरमा रातिको तापक्रम १४ डिग्रीभन्दा कम थियो।
यता राजस्थानको बाडमेरमा दिनको तापक्रम ३८ डिग्री सेल्सियसभन्दा माथि पुगेको छ। पछिल्लो १० वर्षमा यहाँ तापक्रम ३८ डिग्रीभन्दा माथि पुगेको यो दोस्रो पटक हो।
विशेषज्ञहरूका अनुसार प्रदूषित हावामा रहेका धुलो, धुवाँ र सूक्ष्म कण श्वासप्रश्वासमार्फत शरीरभित्र पस्छन्। यसले फोक्सोको कार्यक्षमता घटाउनुका साथै श्वासप्रश्वास, मुटु तथा रक्तनलीसम्बन्धी रोग र फोक्सोको क्यान्सरको जोखिम बढाउन सक्छ। गर्भवती महिला, बालबालिका, वृद्धवृद्धा तथा दम र मुटुका बिरामी बढी जोखिममा हुन्छन्।
