किशोरीमाथि जबरजस्ती करणी गरेको आरोपमा प्रहरीले पाल्पा र कञ्चनपुरबाट चार जनालाई पक्राउ गरेको छ। पक्राउ पर्नेमा पाल्पामा एक जना र कञ्चनपुरमा तीन जना छन्।
नेपाल प्रहरीको केन्द्रीय समाचार कक्षका अनुसार पाल्पामा १६ वर्षीया किशोरीमाथि करणी गरेको आरोपमा ३८ वर्षीय होमबहादुर थापा मगर पक्राउ परेका हुन्। तनहुँको भानु नगरपालिका–८ घर भई पाल्पाको तिनाउ गाउँपालिका–३ देउराली बस्दै आएका थापा मगरलाई आइतबार साँझ पक्राउ गरिएको हो।
किशोरीमाथि करणी भएको भन्दै परेको उजुरीका आधारमा जिल्ला प्रहरी कार्यालय पाल्पाबाट खटिएको टोलीले उनलाई नियन्त्रणमा लिएको प्रहरीले जनाएको छ।
यस्तै, कञ्चनपुरमा १५ वर्षीया किशोरीमाथि करणी गरेको आरोपमा तीन जना पक्राउ परेका छन्। पक्राउ पर्नेमा बेलडाँडी गाउँपालिका–१ का २१ वर्षीय विशाल सुनार, १९ वर्षीय सुवास बलायर र २१ वर्षीय प्रकाश बलायर रहेका छन्।
उजुरीका आधारमा इलाका प्रहरी कार्यालय बेलडाँडीबाट खटिएको टोलीले उनीहरूलाई आइतबार साँझ पक्राउ गरेको केन्द्रीय समाचार कक्षले जनाएको छ।
दुवै घटनाका सम्बन्धमा प्रहरीले थप अनुसन्धान गरिरहेको छ।
दुवै घटनामा पीडित परिवारले दिएको उजुरीका आधारमा प्रहरीले तत्काल कारबाही अघि बढाएको हो।
