पेरिस — फ्रान्सको दोस्रो ठूलो सहर मार्सेमा लागूऔषध गिरोहहरूले बालबालिकालाई अपराधको जालमा तान्ने क्रम तीव्र बनेको छ। सुरुमा पैसाको लोभ देखाएर बिक्री र रकम व्यवस्थापनको काममा लगाइने किशोरकिशोरीलाई पछि अपहरण, यातना र हत्याजस्ता जघन्य अपराधमा समेत प्रयोग गरिँदै आएको एक अनुसन्धानले देखाएको छ।
सन् २०२२ मा मार्सेको एक आवासीय क्षेत्रमा लागूऔषध किन्न पुगेकी महिलालाई एक किशोर विक्रेताले सामानसँगै एउटा कागजको टुक्रा थमाएका थिए। त्यसमा ‘हामीलाई बन्दी बनाइएको छ, सहयोग चाहिएको छ, हामी १५ वर्षका हौँ’ लेखिएको थियो। ती दुई किशोर सुरुमा पैसा कमाउने आशामा गिरोहको सम्पर्कमा पुगेका थिए। तर रकम हिनामिनाको आरोप लगाएर गिरोहले उनीहरूमाथि कुटपिट र यातना सुरु गर्यो। प्रहरीलाई खबर भएपछि दुवैले दोस्रो तलाको झ्यालबाट भाग्न खोजे, एक जना भाग्न सफल भए भने अर्का पक्राउ परे। घटनामा संलग्न छ जनालाई अदालतले कडा सजाय सुनाएको छ।
मार्सेको सबैभन्दा शक्तिशाली समूहमध्ये एक ‘डीजी माफिया’ले सन् २०२३ देखि सामाजिक सञ्जालमार्फत आफ्नो प्रभाव प्रचार गर्न थालेको छ। गिरोहले सामाजिक सञ्जालमा चालक, सामान ओसार्ने र हत्यारासमेत भर्ती गर्ने विज्ञापन राख्ने गरेको छ। फ्रान्समा कोकिन प्रयोगकर्ता सन् २०१७ को ६ लाखबाट बढेर छिट्टै २० लाख पुग्ने अनुमान छ भने लागूऔषध तस्करीबाट वार्षिक सात अर्ब युरोको कारोबार हुने र दुई लाख मानिस संलग्न रहेको बताइएको छ। सन् २०२५ मा मात्रै १० हजारभन्दा बढी बालबालिका कुनै न कुनै रूपमा तस्करीमा संलग्न भएको सरकारी तथ्यांक छ।
गिरोह छाडेको दाबी गर्ने २० वर्षीय क्यामिलका अनुसार युवाहरूलाई महँगा गाडी, अपार्टमेन्ट र विलासी जीवनको प्रलोभन देखाइन्छ। ‘जो’ नामका एक युवकले १३ वर्षकै उमेरमा मासिक तीन हजार युरो कमाएको र अहिले २३ वर्षको हुँदा मासिक पाँच हजारदेखि १० हजार युरोसम्म कमाउने बताएका छन्। सन् २०२४ यता डीजी माफियासँग सम्बन्धित करिब एक हजार व्यक्ति पक्राउ परेका छन् भने ६ सय जना जेलमा छन्।
हिंसाले परिवारमा पार्ने असरको उदाहरण हुन् करिन ब्रुआर। उनका १५ वर्षीय छोरा ह्युगो घरबाट भागेर मार्से पुगेका थिए। सन् २०२३ मा उनको टाउकोमा गोली लागेको खबर आमाले पाइन्। अधिकारीका अनुसार यो समस्या राष्ट्रिय सुरक्षाकै चुनौती बनेको छ, जसले वार्षिक ७०० भन्दा बढीको लागूऔषधको अत्यधिक सेवनबाट मृत्यु निम्त्याइरहेको छ।
