दिवालीको राति भारतका विभिन्न सहरमा पटाका र अन्य कारणले लागेको आगोमा परी २३ जनाको ज्यान गएको छ। धेरै जना घाइते भएका छन् भने केही व्यक्ति अझै बेपत्ता छन्।
सबैभन्दा ठूलो क्षति मध्य प्रदेशमा भएको छ। त्यहाँ तीन छुट्टाछुट्टै घरमा लागेको आगोमा १३ जनाको मृत्यु भएको छ। कटनी जिल्लामा एउटै परिवारका ६ जनाले ज्यान गुमाए, जसमा दुई महिनाको शिशुसहित तीन बालबालिका छन्। सिवनी जिल्लामा एक सुनचाँदी व्यवसायीको घर र पसल जलेर खरानी हुँदा १६ वर्षीय किशोरसहित ६ जनाको मृत्यु भयो। मध्य प्रदेशमा ज्यान गुमाउनेमा ५ महिला, ३ पुरुष र ४ बालबालिका छन्।
महाराष्ट्रको धाराशिव जिल्लामा एउटै परिवारका ६ जनाको घरमा लागेको आगोमा मृत्यु भयो भने मुम्बईको लोखण्डवालामा भएको आगलागीमा एक जनाको ज्यान गयो। मुम्बईकै डोंगरी क्षेत्रमा पसल र सुकुम्बासी बस्ती जले भने दादरको कामगार रंगशालामा लागेको आगो अग्निनियन्त्रकहरूले १७ मिनेटमै नियन्त्रणमा लिए। ठाणेको १७ तले भवनमा लागेको आगोमा कोही घाइते भएनन् भने नागपुरको टीभीएस सोरुममा लागेको आगोले कैयौँ दुईपाङ्ग्रे सवारीसाधन नष्ट भए। पुणेमा दिवालीको राति आगलागीका ६३ घटना भए पनि त्यहाँ मानवीय क्षति भएन।
राजस्थानको पालीस्थित पटाका पसलमा लागेको आगोमा २ जनाको मृत्यु भयो र ३ जना बेपत्ता छन्। उक्त आगोले तीनवटा पसल र कैयौँ दुईपाङ्ग्रे सवारीसाधन नष्ट गर्यो। दिल्लीको नरेलामा रकेट पटाका पेटमा लाग्दा १० वर्षीय बालकको मृत्यु भयो। उत्तर प्रदेशको बान्दामा कबाडी पसलमा लागेको आगोले करिब २० देखि २५ लाख भारु बराबरको क्षति पुर्यायो।
जम्मूको नेहरू मार्केटस्थित गोदाम र बजारमा लागेको आगोले १२ भन्दा बढी पसल जले। असमको जोनाई, मुम्बईको विद्याविहार, सिक्किमको गान्तोकस्थित सरकारी भवन र गाजियाबादको क्रसिङ रिपब्लिक क्षेत्रमा पनि आगलागीका घटना भए। घटनालगत्तै दमकल विभाग र प्रहरीका टोलीहरू राहत तथा उद्धार कार्यमा खटिएका थिए।
