तनहुँ । तिहारअन्तर्गत गाईपूजाको अवसरमा तनहुँका दुई गौसंरक्षण केन्द्रमा आज सामूहिक गाईपूजा गरिएको छ। शुक्लागण्डकी नगरपालिका–९ र व्यास नगरपालिका–१० मा रहेका केन्द्रमा धार्मिक विधिअनुसार गाईको पूजा गरिएको हो।
शुक्लागण्डकी–९ को केन्द्र मुक्तिनाथ च्यवनधामको व्यवस्थापनमा सञ्चालनमा छ। त्यहाँ रहेका गाईलाई माला लगाइदिने, टीका लगाउने र मीठा परिकार खुवाएर सम्मान गरिएको धामका अध्यक्ष होमनाथ लम्सालले जानकारी दिनुभयो। उहाँका अनुसार सडकमा अलपत्र परेका र छाडा रूपमा छोडिएका गाईको संरक्षण, हेरचाह र व्यवस्थापन गर्ने उद्देश्यले केन्द्र स्थापना गरिएको हो। धार्मिक आस्थासँगै गाईको संरक्षणलाई जोड दिँदै केन्द्रले काम गर्दै आएको उहाँले बताउनुभयो।
यस्तै व्यास–१० स्थित गौसंरक्षण केन्द्रमा गाईपूजाको अवसरमा विशेष कार्यक्रम आयोजना गरिएको थियो। व्यास नगरपालिकाका प्रमुख वैकुण्ठ न्यौपानेले गाईपूजा गरी कार्यक्रमको शुभारम्भ गर्नुभएको थियो। केन्द्रका अध्यक्ष तुल्सीराम सापकोटाका अनुसार केन्द्रमा रहेका गाईको सामूहिक पूजाआजा गरिएको हो।
हिन्दू परम्परामा गाईलाई पवित्र जनावरका रूपमा सम्मान गरिन्छ। तिहारमा गाईपूजाका दिन गाईलाई लक्ष्मीको प्रतीक मानेर पूजा गर्ने, माला लगाइदिने र मीठा परिकार खुवाउने चलन रहेको छ।
