काठमाडौं — हलमा प्रदर्शन भएर तीन वर्ष बितिसकेपछि चर्चित नेपाली हास्य फिल्म ‘छक्का पञ्जा ४’ अब युट्युबमा हेर्न पाइने भएको छ। भाइटीकाको दिन कात्तिक २५ गते दिउँसो ३ बजेदेखि फिल्म युट्युबमार्फत स्ट्रिमिङ हुने निर्माता तथा अभिनेता दीपकराज गिरीले जानकारी दिएका छन्।
२०७९ फागुनमा हलमा आएको यो फिल्मले समसामयिक नेपाली राजनीतिमा देखिने विकृति र विसंगतिलाई व्यंग्यात्मक शैलीमा प्रस्तुत गरेको थियो। आमा सरस्वती मुभिज र आईएमईको ब्यानरमा बनेको फिल्मको निर्देशन हेमराज बीसीले गरेका हुन् भने कथा तथा पटकथा दीपकराज गिरीकै हो।
फिल्ममा दीपकराज गिरी, दीपाश्री निरौला, केदार घिमिरे, बेनिशा हमाल, बुद्धि तामाङ, मलिना जोशी, नीर शाह, राज आचार्य, सुष्मा निरौला, वेदना राई, लुनिभा तुलाधर र अनुराग कुँवरलगायत कलाकारले अभिनय गरेका छन्। घरेलु बक्स अफिसमा फिल्मले १७ करोड रूपैयाँभन्दा बढीको ग्रस व्यापार गरेको थियो।
‘छक्का पञ्जा ४’ पछि शृंखलाको पाँचौं भाग ‘छक्का पञ्जा ५’ पनि दुई वर्षअघि नै प्रदर्शन भइसकेको छ। यही समूहको अर्को फिल्म ‘छ माया छपक्कै २’ यस वर्ष दसैंमा हलमा आएको थियो र अहिले पनि सिनेमाहलमा चलिरहेको छ।
