वासिङ्टन डिसी । अमेरिकी राष्ट्रपति डोनाल्ड ट्रम्पले इरानविरुद्धको सैन्य कारबाहीका कारण महाभियोगको दबाबमा परेका युद्धमन्त्री पीट हेग्सेथको खुलेर बचाउ गरेका छन् । हेग्सेथले दुई वटा युद्ध जितेको दाबी गर्दै ट्रम्पले महाभियोगको पहल गरेका रिपब्लिकन सांसद थोमस म्यासीको कडा आलोचना गरे ।
सोमबार सञ्चारकर्मीसँग कुरा गर्दै ट्रम्पले इरानसँगको युद्धमा १८ जना अमेरिकी सैनिकले ज्यान गुमाएको बताए । उनले भियतनाम युद्धमा ६५ हजार अमेरिकीको मृत्यु भएको स्मरण गराउँदै इराक र अफगानिस्तानका युद्ध सञ्चालन गर्ने नेतृत्वमाथि कहिल्यै महाभियोग नलगाइएको तर्क गरे । त्यसैले हेग्सेथलाई मात्रै निशाना बनाउनु अनुचित भएको उनको भनाइ थियो ।
केन्टकीबाट निर्वाचित सांसद म्यासीले हेग्सेथमाथि कार्यकारी अधिकारको दुरुपयोग गरेको र इरानसँग युद्ध सुरु गर्न गैरकानूनी आदेश कार्यान्वयन गरेको आरोप लगाउँदै महाभियोग प्रस्ताव पेस गरेका थिए । सदनको नियमअनुसार उक्त प्रस्तावमाथि बुधबारसम्म प्रक्रियागत मतदान हुनुपर्नेछ ।
यसैबीच हेग्सेथले मंगलबार पेन्टागनमा पत्रकार सम्मेलन गरेर महाभियोग प्रस्तावबारे आफ्नो धारणा सार्वजनिक गर्ने बताएका छन् । ट्रम्पले अमेरिकी कारबाहीले इरानको आणविक पूर्वाधार ध्वस्त पारेको र इरानलाई आणविक क्षमता हासिल गर्नबाट रोकेको दाबी गरे । उनले उक्त कारबाहीले इजरायल र मध्यपूर्वको सुरक्षा गरेको समेत बताए ।
सदनका डेमोक्रेटिक नेता हकीम जेफ्रीजले पनि हेग्सेथविरुद्धको महाभियोग पहललाई समर्थन गरेका छन् ।
