दक्षिण भारतीय सुपरस्टार सूर्या अभिनीत तमिल फिल्म ‘सीन’ले बक्स अफिसमा धमाकेदार सुरुवात गरेको छ। प्रदर्शनको चार दिनमै फिल्मले विश्वभर १५२ करोड २० लाख रुपैयाँभन्दा बढीको व्यापार गरेको छ।
जीतु माधवनको निर्देशनमा बनेको यो फिल्म नोभेम्बर ६ मा हलमा रिलिज भएको थियो। भारतीय सञ्चारमाध्यमले उल्लेख गरेको प्रारम्भिक तथ्यांकअनुसार फिल्मले चौथो दिन अर्थात् नोभेम्बर ९ मा भारतमा मात्र २१ करोड ४० लाख रुपैयाँ नेट कलेक्सन गरेको छ। त्यस दिन देशभर फिल्मका कुल पाँच हजार ८०१ शो प्रदर्शन भएका थिए, जसमध्ये तमिल संस्करणका चार हजार ३७८ शोबाट १७ करोड ९० लाख र तेलुगु संस्करणका एक हजार ४२३ शोबाट तीन करोड ५० लाख रुपैयाँ संकलन भएको थियो।
यससँगै फिल्मको भारतमा कुल ग्रस कलेक्सन ९८ करोड २० लाख रुपैयाँ पुगेको छ भने नेट कलेक्सन ८४ करोड ५५ लाख रुपैयाँ भएको छ। विदेशी बजारमा पनि फिल्मले राम्रो प्रतिक्रिया पाइरहेको छ। चौथो दिन मात्रै विदेशबाट करिब सात करोड ५० लाख रुपैयाँ कमाएको फिल्मको कुल विदेशी ग्रस कलेक्सन ५४ करोड रुपैयाँ पुगेको छ। अब फिल्म २०० करोड रुपैयाँको आँकडा पार गर्ने लक्ष्यतर्फ अघि बढेको छ।
‘सीन’को सफलतासँगै सूर्या लगातार तेस्रो हिट फिल्म दिन सफल भएका छन्। यसअघि उनका ‘करुप्पु’ र ‘विश्वनाथ एन्ड सन्स’ले पनि बक्स अफिसमा राम्रो प्रदर्शन गरेका थिए। फिल्ममा सूर्यासँगै नजरिया नाजिम र नसलेन मुख्य भूमिकामा छन्। आनन्दरराज, लाल र राज प्रियनले पनि महत्त्वपूर्ण भूमिका निर्वाह गरेका छन्। सूर्या र ज्योतिकाले आफ्नो निर्माण कम्पनी टुडि–इन्टरटेनमेन्ट र झागरम स्टुडियोजको ब्यानरमा फिल्म निर्माण गरेका हुन्।
यसैबीच नितेश तिवारी निर्देशित ‘रामायणः पार्ट वान’ले पनि बक्स अफिसमा नयाँ कीर्तिमान बनाइरहेको छ। रणवीर कपुर, यश र साई पल्लवी मुख्य भूमिकामा रहेको यो फिल्म नोभेम्बर ५ मा प्रदर्शनमा आएको थियो र पाँच दिनभित्रै विश्वभर ६६३ करोड रुपैयाँ ग्रस कलेक्सन गरेको छ।
