पाकिस्तानका पूर्वप्रधानमन्त्री इमरान खान र उनकी पत्नी बुशरा बीबीसँग उनीहरूका वकिलले एक घण्टासम्म भेटघाट गर्न पाउने भएका छन्। इस्लामाबाद उच्च अदालतले रावलपिण्डीको अदियाला जेल प्रशासनलाई भेटघाटको व्यवस्था मिलाउन निर्देशन दिएको छ।
मुख्य न्यायाधीश सरफराज डोगरको नेतृत्वमा रहेको दुई सदस्यीय इजलासले १९ करोड पाउन्डको अल कादिर ट्रस्ट प्रकरणमा सुनाइएको सजायविरुद्ध परेको पुनरावेदनमाथि सुनुवाइ गर्दै यो आदेश दिएको हो।
सुनुवाइका क्रममा अदालतले सुरुमा बुशरा बीबी र इमरान खानसँग वकिल सरदार लतिफ खोसालाई भेट्न अनुमति दिएको थियो। त्यसपछि इमरान खानका अर्का वकिल सलमान सफदरलाई पनि भेट्न दिइएको छ। सफदरले अघिल्लो भेटमा पर्याप्त समय नपुगेकाले पुनः भेट्न आवश्यक रहेको बताएका थिए।
अदालतले कानुनअनुसार भेटघाटको अनुमति दिएको स्पष्ट पार्दै थप पाँच जनालाई पनि इमरानसँग भेट्न दिनुपर्ने माग नआओस् भन्ने चेतावनी समेत दिएको छ। इजलासका प्रमुखले केही दिनअघि मात्रै भेटिसकेको अवस्थामा फेरि किन भेट्न चाहेको भन्दै सफदरलाई प्रश्न गरेका थिए।
सुनुवाइमा बुशरा बीबीको स्वास्थ्य अवस्थाको विषय पनि उठेको थियो। सफदरले छ महिनाअघि जेल प्रशासनले शल्यक्रियाका लागि अस्पताल लगेको र आगामी नोभेम्बर १५ मा पुनः शल्यक्रिया गर्नुपर्ने जानकारी अदालतलाई गराए। उनले स्वास्थ्य परीक्षणका लागि मेडिकल बोर्ड गठन गर्न माग गरेका छन्। सर्वोच्च अदालतमा समेत जेल प्रशासनले बुशराको आँखामा समस्या रहेको स्वीकार गरेको उनको भनाइ छ।
