बुल्गेरियामा मंगलबार बाक्लो हुस्सुका कारण भएको ठूलो सडक दुर्घटनामा १२ जनाको ज्यान गएको छ भने ४६ जना घाइते भएका छन्। राजधानी सोफियालाई कालोसागर किनारको बन्दरगाह सहर बुर्गाससँग जोड्ने राजमार्गमा एकपछि अर्को गर्दै ८६ वटा गाडी आपसमा ठोक्किएका थिए।
अधिकारीहरूका अनुसार पहिलो दुर्घटना राजमार्गको पूर्वतर्फ जाने लेनमा भएको थियो। हुस्सु यति बाक्लो थियो कि चालकहरूले अगाडि गुडिरहेका गाडी देख्नै सकेनन्। त्यसको केही बेरमै सोफियातर्फ जाने अर्को लेनमा पनि गाडीहरू ठोक्किन थाले। अर्कोतर्फ भएको दुर्घटना हेर्दाहेर्दै केही चालकको ध्यान सडकबाट हटेको र उनीहरू पनि दुर्घटनामा परेको बताइएको छ। गाडीहरूको तीव्र गतिले जोखिम झन् बढाएको अधिकारीहरूको भनाइ छ।
दुर्घटनापछि राजमार्ग दुवैतर्फ बन्द गरिएको छ। क्षतिग्रस्त गाडी र भग्नावशेष हटाएपछि मात्र सडक खुला गरिने जनाइएको छ। याम्बोल क्षेत्रका गभर्नर जर्जी चालाकोभका अनुसार कैयौँ मानिस गाडीभित्रै थुनिएका थिए र उनीहरूलाई निकाल्न उद्धार टोलीले सडकछेउको ब्यारियरका केही भाग काट्नुपरेको थियो। हुस्सुका कारण हेलिकप्टरबाट घाइते ओसार्न सकिएन। एउटा गाडीमा आगो लागेको थियो, जसमा फसेका एक जनालाई त्यहाँ उपस्थित एक व्यक्तिले आफ्नो ज्यान जोखिममा पारेर बाहिर निकालेका थिए।
दुर्घटनाको खबर पाएपछि बुल्गेरियाकी राष्ट्रपति इलियाना योतोभाले पेरिस पिस फोरममा सहभागिता बीचमै छाडेर स्वदेश फर्कने निर्णय गरिन्। युरोपेली आयोगकी अध्यक्ष उर्सुला भोन डेर लेयेन पनि मंगलबार बुल्गेरिया भ्रमणमा थिइन्। प्रधानमन्त्री रुमेन रादेव उनसँगको भेटवार्ता छाडेर घटनास्थलतर्फ गएका थिए।
