इजिप्टमा स्वतन्त्र सञ्चारमाध्यममाथिको सरकारी दबाब बढ्दै गएको भन्दै संयुक्त राष्ट्रसङ्घसहित अन्तर्राष्ट्रिय अधिकारवादी संस्थाहरूले चिन्ता व्यक्त गरेका छन्। स्वतन्त्र समाचार संस्था मादा मसरकी प्रमुख पत्रकार लिना अत्तालाहले समाचार प्रकाशनसम्बन्धी मुद्दामा पुनः जेल सजायको सामना गर्नुपर्ने भएको छ।
बिनाअनुमति समाचार वेबसाइट चलाएको र गलत समाचार प्रकाशित गरेको आरोपमा सन् २०२४ मा अत्तालाहलाई उनको अनुपस्थितिमै एक वर्षको जेल सजाय सुनाइएको थियो। उनी बुधबार फौजदारी अदालतमा उपस्थित हुन लागेकी छन्। उनले गत महिना मात्रै उक्त फैसलाबारे थाहा पाएकी थिइन्। यसअघि अर्को मुद्दामा उनलाई ३० लाख इजिप्टियन पाउन्ड जरिवाना गरिएको थियो र अदालतले मादा मसर बन्द गर्नसमेत आदेश दिएको थियो।
संयुक्त राष्ट्रसङ्घले अत्तालाहमाथिको अभियोजनले निष्पक्ष सुनुवाइ र कानुनी प्रक्रियाको सुनिश्चिततामाथि प्रश्न उठाएको जनाएको छ। इजिप्टमा स्वतन्त्र पत्रकारमाथि मुद्दा चलाउने र उत्पीडन गर्ने क्रम बढेको भन्दै राष्ट्रसङ्घले यस्तो दमन रोक्न आग्रह गरेको छ।
अत्तालाहका अनुसार मादा मसरले विगत आठ वर्षदेखि सञ्चालन अनुमतिका लागि प्रयास गर्दै आए पनि सरकारले कुनै जवाफ दिएको छैन। अनुमतिपत्रलाई सञ्चारमाध्यम नियन्त्रण गर्ने र निश्चित संस्थालाई बहिष्करण गर्ने माध्यम बनाइएको उनको आपत्ति छ।
यसैबीच, तथ्य जाँच गर्ने संस्था मत्सदाका सबै पत्रकार पक्राउ परेपछि सञ्चारमाध्यममाथिको दमन थप बढेको एम्नेस्टी इन्टरनेसनलसहितका अधिकारवादी संस्थाहरूले बताएका छन्। राष्ट्रसङ्घका अनुसार छ जना पत्रकार पूर्वपरीक्षण हिरासतमा छन् र उनीहरूलाई यातना दिएर दबाबमा झुटा स्वीकारोक्ति गराइएको आरोपसमेत लागेको छ। अमेरिकी सांसद, युरोपेली सङ्घ तथा १३५ अधिकारवादी र सञ्चार सङ्गठनले इजिप्टमा बढ्दो दमनको आलोचना गर्दै मादा मसरमाथिको प्रतिबन्ध हटाउन र प्रेस स्वतन्त्रताको अधिकार सुनिश्चित गर्न माग गरेका छन्। पत्रकार संरक्षण समितिकी क्षेत्रीय निर्देशक सारा कुदाहले यस विषयलाई इजिप्टसँगको राजनीतिक वार्तामा उठाउन युरोपेली सङ्घलाई आग्रह गरेकी छन्।
