२५ कात्तिक, काठमाडौं । प्रधानमन्त्री वालेन्द्र शाहले भाइटीकाले दाजुभाइ र दिदीबहिनीबीचको प्रेम, विश्वास र आत्मीयतालाई अझ गहिरो बनाउने विश्वास व्यक्त गरेका छन्। यमपञ्चकको अन्तिम दिन भाइटीकाको अवसरमा उनले देशभित्र र विदेशमा रहेका सबै नेपाली दाजुभाइ तथा दिदीबहिनीलाई शुभकामना दिएका हुन्।
प्रधानमन्त्री शाहले जारी गरेको शुभकामना सन्देशमा भाइटीकासँग जोडिएको पौराणिक कथा स्मरण गरिएको छ। कथाअनुसार कार्तिक शुक्ल द्वितीयाका दिन बहिनी यमुनाको निम्तोमा दाजु यमराज उनको घर पुगेका थिए। यमुनाले दाजुलाई विधिपूर्वक टीका र पूजा गरेर स्वागत गरेकी थिइन्।
बहिनीको माया, निष्ठा र आतिथ्यबाट खुसी भएका यमराजले त्यस दिन बहिनीबाट टीका ग्रहण गर्ने दाजुभाइ मृत्युको डरबाट मुक्त हुने र दीर्घायु, सुस्वास्थ्य र सौभाग्य पाउने वरदान दिएको विश्वास रहेको सन्देशमा उल्लेख छ।
सोही विश्वासका साथ भाइटीकाका दिन दिदीबहिनीले दाजुभाइको स्वास्थ्य, दीर्घायु र प्रगतिको कामना गर्दै पूजा गर्ने चलन छ। यस दिन दाजुभाइलाई दुबो, मखमली र सयपत्रीका माला लगाइदिने, ओखर फुटाउने, तेलको रेखाले छेक्ने र सप्तरङ्गी टीका लगाउने परम्परा छ। विभिन्न मिठा परिकार खुवाउने र दाजुभाइले गच्छेअनुसार दक्षिणा दिएर बहिनीको आशीर्वाद लिने चलन पनि रहेको प्रधानमन्त्री शाहले सन्देशमा बताएका छन्।
