भारतको उत्तरपूर्वी राज्य अरुणाचल प्रदेशमा प्रस्तावित ठूलो जलविद्युत् आयोजनाको विरोधमा भएको प्रदर्शनले हिंसात्मक रूप लिएको छ। प्रदर्शनकारी र सुरक्षाकर्मीबीच शुक्रबार राति भएको झडपमा करिब ४० जना प्रहरी घाइते भएका छन्।
राज्यका मुख्यमन्त्री पेमा खाण्डुका अनुसार, विरोधमा उत्रिएको भीडले प्रहरी चौकी तथा सरकारी भवनमा तोडफोड गरेको थियो भने केही संरचनामा आगोसमेत लगाएको थियो। जनप्रतिनिधिहरूका घरमा समेत लुटपाट भएको उनले बताएका छन्। प्रदर्शनकारीले हानेको ढुङ्गा लागेर प्रहरी घाइते भएपछि भीड नियन्त्रण गर्न अश्रुग्यास प्रयोग गरिएको थियो।
विरोधको केन्द्रमा सरकारी जलविद्युत् कम्पनी एनएचपीसीले अघि सारेको ११ हजार २०० मेगावाट क्षमताको सियाङ अपर मल्टिपर्पज प्रोजेक्ट रहेको छ। यो आयोजना चीनसँग सीमा जोडिएको हिमाली क्षेत्रमा प्रस्तावित छ। मुख्यमन्त्री खाण्डुले विरोधरत स्थानीयलाई हिंसा छाडेर सरकारसँग छलफलमा बस्न आग्रह गरेका छन्।
भारतले यो बाँध आवश्यक रहेको तर्क गर्दै आएको छ। तिब्बतमा चीनले निर्माण गर्न लागेको विशाल जलविद्युत् परियोजनाले ब्रह्मपुत्र नदीको तल्लो तटीय क्षेत्रमा पानीको बहावमा असर पार्न सक्ने नयाँ दिल्लीको चिन्ता छ। करिब १६७ अर्ब अमेरिकी डलर लागत अनुमान गरिएको चिनियाँ आयोजना विश्वकै सबैभन्दा ठूलो जलविद्युत् परियोजना बन्न सक्ने बताइएको छ। प्रस्तावित भारतीय बाँधमा ठूलो जलाशय बनाएर नदीको बहाव कायम राख्न सकिने भारतको भनाइ छ। बेइजिङले भने आफ्नो परियोजनाले तल्लो तटीय क्षेत्रमा कुनै नकारात्मक असर नपार्ने दाबी गर्दै आएको छ।
स्थानीय समुदायले पनि आयोजनाको विरोध गर्दै आएका छन्। बाँध बने आफूहरूले घर र जमिन गुमाउनुपर्ने उनीहरूको चिन्ता छ। यस घटनाले हिमालय क्षेत्रमा भारत र चीनबीचको सीमा तनावलाई फेरि उजागर गरेको छ। चीनले अरुणाचल प्रदेशलाई दक्षिणी तिब्बतको हिस्सा दाबी गर्दै आएको छ भने भारतले उक्त राज्य आफ्नो अभिन्न भूभाग भएको बताउँदै आएको छ। भारतको विदेश मन्त्रालयका प्रवक्ता रणधीर जयसवालले शुक्रबार सीमा क्षेत्रमा तनाव व्यवस्थापनका लागि दुवै देशका अधिकारी नियमित सम्पर्कमा रहेको बताएका थिए।
