काठमाडौं — नेपाल क्रिकेट संघ (क्यान) को आयोजनामा सोमबारदेखि सुरु हुन लागेको सिद्धार्थ बैंक नेपाल प्रिमियर लिग (एनपीएल) को तेस्रो संस्करण अघिल्ला दुई संस्करणभन्दा फरक र विशेष हुने संघले दाबी गरेको छ। आइतबार आयोजित पत्रकार सम्मेलनमा क्यानका पदाधिकारीहरूले यसपटकको प्रतियोगितालाई ऐतिहासिक बनाउने चार आधार प्रस्तुत गरे।
पहिलो आधार अन्तर्राष्ट्रिय मान्यता हो। यसपटकको एनपीएलले औपचारिक रूपमा अन्तर्राष्ट्रिय मान्यता पाएको छ, जसले प्रतियोगिताको दायरा मात्र होइन, त्यससँग जोडिएका सबै पक्षको जिम्मेवारी पनि बढाएको क्यानको भनाइ छ। संघ, टिम मालिक, सरोकारवाला र खेलकुद पत्रकार सबैको भूमिका अब अन्तर्राष्ट्रिय स्तरमा पुग्ने भएकाले यस संस्करणले नेपाली क्रिकेटलाई विश्वमाझ चिनाउने अपेक्षा गरिएको छ।
दोस्रो आधार व्यवस्थापन संरचना हो। क्यानको बोर्ड र साधारण सभाले सचिव पारस खड्का, कोषाध्यक्ष पदम बहादुर खडा र सुगुल शर्मा रहेको तीन सदस्यीय गभर्निङ काउन्सिललाई पूर्ण अधिकार दिएको छ। छिटो निर्णय गर्न सक्ने यो संरचनाले प्रतियोगिताको व्यवस्थापन यसपटक बढी प्रभावकारी हुने विश्वास गरिएको छ।
तेस्रो आधार सञ्चारमाध्यमको उत्साह हो। राष्ट्रिय तथा अन्तर्राष्ट्रिय प्रतियोगिताप्रति नेपाली सञ्चारकर्मीको सक्रिय सहभागिता र उत्साहले खेलप्रतिको जनलहर बढाएको क्यानले जनाएको छ।
चौथो आधार साझा प्रयास हो। राष्ट्रिय खेलकुद परिषद्, नेपाल सरकार, शिक्षा तथा खेलकुद मन्त्रालय र श्रम मन्त्रालय, काठमाडौं जिल्ला प्रशासन कार्यालय, नेपाल प्रहरी, सशस्त्र प्रहरी, नेपाली सेना, स्वयंसेवक र टिम मालिकको संयुक्त प्रयासले तेस्रो संस्करण ऐतिहासिक बन्ने क्यानको दाबी छ।
