नैरोबी । तान्जानिया सरकारका आलोचक तथा पूर्व विपक्षी नेता त्वाहा म्वाइपाया केन्यामा अपहरणमा परेका छन्। तान्जानियाको मुख्य विपक्षी दल चादेमाको युवा सङ्गठनका प्रमुख रहेका म्वाइपाया केन्यामा स्वनिर्वासनमा बस्दै आएका थिए।
तान्जानिया सरकारले विपक्षी दलमाथि कडा दमन गर्दै आएको छ। सरकारको आलोचना गर्ने धेरै विपक्षी नेताले छिमेकी केन्या गएर शरण लिएका छन्। तर केन्यामा पनि उनीहरूमाथि अपहरणका प्रयास हुने गरेको आरोप लाग्दै आएको छ।
म्वाइपायालाई सन् २०२२ मा सरकारको आलोचना गरेको आरोपमा पक्राउ गरी जेल पठाइएको थियो। पछि अदालतबाट उन्मुक्ति पाएपछि उनी केन्या पुगेका थिए। इन्स्टाग्राममा उनका करिब छ लाख फलोअर छन्। उनी राष्ट्रपति सामिया सुलुहु हस्सानको सरकारविरुद्ध सामाजिक सञ्जालमा निरन्तर अभिव्यक्ति दिँदै आएका छन्। विपक्षी दलले हस्सानको सरकारमाथि एक वर्षअघिको निर्वाचनका क्रममा हजारौँ प्रदर्शनकारीको हत्या गरेको आरोप लगाउँदै आएको छ।
एम्नेस्टीका अनुसार म्वाइपायालाई आइतबार दिउँसो नैरोबीको पूर्वमा रहेको माचाकोस काउन्टीको कामुलुमा साथीहरूलाई भेट्न ट्याक्सीमा जाँदै गर्दा तीनवटा सवारीसाधनमा आएका व्यक्तिहरूले अपहरण गरेका थिए। अधिकार समूहले एक्समार्फत म्वाइपायाको अवस्थाबारे जानकारी भएकालाई तत्काल सम्पर्क गर्न र केन्याली अधिकारीहरूलाई उनको अवस्था पत्ता लगाई सुरक्षा सुनिश्चित गर्न आग्रह गरेको छ।
सन् २०२५ जनवरीमा प्रख्यात तान्जानियाली अधिकारकर्मी मारिया सारुङ्गी त्सेहाइलाई पनि नैरोबीमा यस्तै परिस्थितिमा अपहरण गरिएको थियो। अधिकार समूह र सञ्चारमाध्यमको विरोधपछि सीमापार गराउनुअघि नै उनलाई रिहा गरिएको थियो। फेब्रुअरीमा अर्का अधिकारकर्मी शाबाहा शाबाहा हम्जालाई पनि अपहरण गरिएको थियो।
