लुम्बिनी विकास कोषको उपाध्यक्षमा आनी छोइङ डोल्माको नियुक्तिविरुद्ध राष्ट्रिय जेन्जी नागरिक अभियानले सोमबार काठमाडौंको माइतीघर मण्डलामा शान्तिपूर्ण विरोध सभा गर्ने भएको छ। अभियानको केन्द्रीय समितिले आइतबार सूचना जारी गर्दै उक्त कार्यक्रमको जानकारी दिएको हो।
संस्कृति, पर्यटन तथा नागरिक उड्डयन मन्त्रालयको प्रस्तावमा गत असोज ३० गते बसेको मन्त्रिपरिषद् बैठकले बौद्ध भिक्षुणी आनी छोइङ डोल्मा (छोइङ डोल्मा लामा मोक्तान) लाई कोषको उपाध्यक्षमा नियुक्त गर्ने निर्णय गरेको थियो। अभियानले सो निर्णयप्रति आपत्ति जनाएको छ।
अभियानको दाबीअनुसार आनी छोइङ डोल्मामाथि नागरिकता किर्ते र सम्पत्ति शुद्धीकरणसम्बन्धी मुद्दा विचाराधीन अवस्थामा छ। त्यसैले उनको नियुक्तिको कानुनी आधार र औचित्य सार्वजनिक गर्नुका साथै उठेका प्रश्नहरूमाथि निष्पक्ष छानबिन हुनुपर्ने माग अभियानले राखेको छ।
विरोध सभा कार्तिक ९ गते सोमबार बिहान ११ बजे माइतीघर मण्डलामा हुनेछ। कार्यक्रममा जेन्जी बौद्ध धर्मावलम्बी, नागरिक समाज, सरोकारवाला तथा पत्रकारहरूलाई उपस्थित हुन अभियानले आग्रह गरेको छ।
