नेपाल प्रिमियर लिगको तेस्रो संस्करणको उद्घाटन खेलमै नेपाली क्रिकेटले एउटा नयाँ अध्याय थपेको छ। यस संस्करणदेखि लागू गरिएको अम्पायर डिसिजन रिभ्यू सिस्टम (डीआरएस) पहिलोपटक प्रयोगमा आएको हो, तर पहिलो प्रयोगबाट लुम्बिनी लायन्सले फाइदा उठाउन सकेन।
उद्घाटन भिडन्तमा सुदूरपश्चिम रोयल्स र लुम्बिनी लायन्स आमनेसामने छन्। टसमा पराजित भएको सुदूरपश्चिमले पहिले ब्याटिङ गरिरहेको छ। खेलको दोस्रो ओभरको अन्तिम बलमा लुम्बिनीका बलर शेर मल्लले सुदूरपश्चिमका ओपनर सैफ जैबविरुद्ध एलबीडब्लूको जोडदार अपिल गरे।
मैदानका अम्पायरले भने ब्याटरलाई आउट दिएनन्। निर्णय चित्त नबुझेपछि लुम्बिनीका कप्तान रोहित पौडेलले डीआरएसको सहारा लिए। तर बल ट्र्याकिङको पुनरावलोकनले पनि बल विकेटमा लाग्ने नदेखिएपछि अम्पायरको मूल निर्णय नै कायम रह्यो र लुम्बिनीले लिएको रिभ्यू खेर गयो।
नेपाली क्रिकेटको इतिहासमा डीआरएस प्रयोग भएको यो पहिलो अवसर हो। यसअघिका संस्करणमा यस्तो प्रविधि उपलब्ध थिएन। यसपालि डीआरएस भित्रिएसँगै विवादास्पद निर्णय सच्याउने बाटो खुलेको छ, यद्यपि पहिलो प्रयास भने लुम्बिनीको पक्षमा रहेन।
खेलको सुरुवाती चरणमै रिभ्यू गुमाउनु लुम्बिनीलाई पछिल्ला ओभरमा केही असहज हुन सक्छ, किनकि महत्वपूर्ण क्षणमा रिभ्यूको आवश्यकता पर्न सक्छ। तैपनि, डीआरएसको आगमनले नेपाली घरेलु क्रिकेटमा निर्णय प्रक्रियालाई अझ पारदर्शी र विश्वसनीय बनाउने अपेक्षा गरिएको छ।
