दसैंको मुख्य चहलपहलअघि वर्षा र बाढीपहिरोले धेरै रुट अनिश्चित बनाएका थिए। तर निकायहरूको संयुक्त प्रयासले यसपालिको दसैं यात्रा सुरक्षित र व्यवस्थित रह्यो।
सडक विभागले अवरुद्ध सडक युद्धस्तरमा खुलायो, स्थानीय सरकारले साथ दिए। यातायात व्यवस्था विभागले घटस्थापनादेखि कोजाग्रत पूर्णिमासम्म देशभरि रुट परमिट खुला गरेको थियो। पूर्वाधार विकास समितिका सभापति आशिष गजुरेलका अनुसार संसदीय समितिको नेतृत्वमा सबै निकायले संयुक्त पहल गरेका थिए, जसले सकारात्मक नतिजा दिएको छ। दसैंअघि सरकारलाई बुझाइएको प्रतिवेदन अनुसार काम भएको र यसपालि यात्रामा धेरै गुनासो नसुनिएको उनको भनाइ छ।
बढी भाडा लिएको गुनासोमा ट्राफिक प्रहरीमार्फत कारबाही गराइएको र राजमार्गमा बासी खाना तथा बढी मूल्य लिएको विषयमा सम्बन्धित मन्त्रालयले पहल गरेको गजुरेलले बताए। बाढीले असम्भव जस्तै बनाएका ठाउँमा पनि केही दिनमै ट्र्याक खोल्नु र नेपाली सेनाको सहयोगमा बेलिब्रिज जडान गर्नुले सडक विभागको क्षमता बढेको पुष्टि हुने उनको तर्क छ।
उपत्यका ट्राफिक प्रहरीको तथ्यांक अनुसार गत वर्ष दसैंमा १५५ दुर्घटना र १० जनाको मृत्यु भएकामा यस वर्ष १०५ दुर्घटना र ३ जनाको मृत्यु भएको छ। प्रवक्ता तथा प्रहरी उपरीक्षक नरेशराज सुवेदीका अनुसार अधिकांश दुर्घटना दुईपांग्रे सवारीका छन् र मुख्य कारण तीव्र गति हो।
यातायात व्यवसायीका अनुसार बाढी, बाटोको अवस्था र व्यापारमा आएको सुस्तताका कारण यस वर्ष सार्वजनिक यातायातमा चाप तुलनात्मक रूपमा कम थियो। नेपाल यातायात व्यवसायी राष्ट्रिय महासंघका अध्यक्ष सरोज सिटौलाका अनुसार यात्रुलाई सुरक्षित गाउँ पुर्याएर सुरक्षित काठमाडौं फर्काउन सफल भइएको छ। उपत्यका छाड्नेमध्ये करिब २५ प्रतिशत यात्रु तिहार र छठसम्मै गाउँमै बस्ने अनुमान छ, त्यसैले तिहारको दुईतर्फी चाप पनि व्यवस्थापन गर्न सकिने उनको भनाइ छ। सोमबार गुल्मीमा भएको स्कारपियो दुर्घटनामा भने कम्तीमा ६ जनाको ज्यान गएको छ।
