कञ्चनपुरमा आगामी मङ्सिर ३ गतेदेखि दशौँ संस्करणको लालझाडी कप फुटबल प्रतियोगिता सुरु हुने भएको छ। आयोजक लालझाडी युवा क्लब ११ ले सोमबार पत्रकार सम्मेलन गरेर प्रतियोगिता मङ्सिर ११ गतेसम्म चल्ने जानकारी दिएको हो।
क्लबका अध्यक्ष काशीराम बोहराका अनुसार यसपटक पुरुषतर्फ पालिकास्तरीय प्रतिस्पर्धा हुनेछ भने महिलातर्फ खुला प्रतियोगिता आयोजना गरिनेछ। यो क्षेत्र फुटबलका लागि परिचित रहेको र यहाँका थुप्रै खेलाडीले विभिन्न उमेर समूहमा राष्ट्रिय लिग खेलिसकेको उनले बताए। हरेक संस्करणमा पुरस्कार राशि बढाउँदै लगिएको पनि उनको भनाइ छ।
पुरुषतर्फ उपाधि जित्ने टोलीले तीन लाख रुपैयाँ नगदसहित ट्रफी, मेडल र प्रमाणपत्र पाउनेछ। उपविजेता टोलीले एक लाख ५० हजार रुपैयाँ नगद पुरस्कार प्राप्त गर्नेछ। महिलातर्फ विजेताले ५० हजार र उपविजेताले २५ हजार रुपैयाँ नगदसहित ट्रफी, मेडल र प्रमाणपत्र पाउने आयोजकले जनाएको छ।
प्रतियोगितामा उत्कृष्ट खेलाडीले २५ हजार रुपैयाँ पुरस्कार पाउनेछन्। उत्कृष्ट गोलरक्षक, उत्कृष्ट रक्षक, उत्कृष्ट मिडफिल्डर, सर्वाधिक गोलकर्ता, उदयीमान खेलाडी र उत्कृष्ट प्रशिक्षकलाई पनि छुट्टाछुट्टै नगद पुरस्कार दिइनेछ। आयोजकले प्रतियोगिताले स्थानीय खेलाडीको प्रतिभा उजागर गर्न र फुटबल विकासमा सघाउने अपेक्षा गरेको छ।
