काभ्रेपलाञ्चोकको मण्डनदेउपुर नगरपालिका–१० मा पर्ने कोटथुम्का पछिल्लो समय घुम्न जानेहरूका लागि आकर्षक गन्तव्य बन्दै गएको छ। धुलिखेलबाट करिब ३० किलोमिटर टाढा, समुद्री सतहबाट करिब दुई हजार ५०० मिटरको उचाइमा रहेको यो थुम्काबाट मौसम सफा भएको दिन सगरमाथासहित उत्तरतर्फका हिमशृङ्खला देखिन्छन्। गणेश, जुगल, गौरीशङ्कर र लाङटाङका चुचुरा यहाँबाट एकै लहरमा देखिने भएकाले यो ठाउँ दृश्यावलोकनका लागि उत्तम मानिन्छ।
पछिल्ला वर्षमा यहाँ बुद्धको प्रतिमा र पार्क बनेपछि कोटथुम्काको आकर्षण अझ बढेको छ। स्थानीयका अनुसार बौद्ध धर्मालम्बीहरूले यस स्थललाई समाधि बुद्ध माउण्टेनका रूपमा चिन्न थालेका छन् र प्रतिमा बनेपछि यहाँ आउनेको सङ्ख्या उल्लेख्य रूपमा बढेको छ। २०७२ सालको भूकम्पपछि रामपुर भीमसेन थुम्कामा बुद्धपार्क निर्माण गरिएको हो। धार्मिक गुरु भन्ते वीमालाले विश्व शान्तिको कामना गर्दै प्रतिमा निर्माण गरेका थिए र त्यसमा करिब चार करोड रुपैयाँ लगानी भएको स्थानीय अगुवा गणेश पराजुलीले बताएका छन्।
कोटथुम्का वरिपरि उमादेवी मन्दिर, कश्यपेश्वर महादेव मन्दिर, गुप्तेश्वर महादेव गुफा र खर्कको पोखरीजस्ता गन्तव्य पनि छन्। दोलालघाट तथा मण्डन क्षेत्रबाट हाइकिङ वा सवारीसाधनमार्फत यहाँ पुग्न सकिन्छ। बाटोमा काभ्रे र सिन्धुपाल्चोकको सीमाना भएर बग्ने इन्द्रावती नदीको दृश्यले यात्रुलाई लोभ्याउँछ भने नजिकका जङ्गलमा फागुन र चैतमा लालीगुराँस फुल्छ।
स्थानीय शिक्षक शालिकराम श्रेष्ठका अनुसार कोटथुम्कालाई अझ व्यवस्थित पर्यटकीय गन्तव्य बनाउन सङ्घीय सरकारले थप पूर्वाधारमा लगानी गर्नुपर्छ। सामाजिक कार्यकर्ता रामबहादुर तामाङले स्थानीय अगुवासँग पूर्वाधारबारे छलफल चलिरहेको बताएका छन्। स्थानीयको भनाइमा आन्तरिक र बाह्य पर्यटक भित्र्याउन स्थानीय तहको प्रयास मात्र पर्याप्त छैन, जिल्ला र राष्ट्रिय तहबाटै पहल आवश्यक छ। नजिकैको थानडाँडामा खानेपानी र बसोवासको सुविधा राम्रो भएकाले त्यस क्षेत्रले पनि पर्यटकलाई सहज बनाउने अपेक्षा गरिएको छ।
