अमेरिकाको दक्षिणी क्यालिफोर्नियामा सक्रिय श्री पशुपतिनाथ फाउन्डेसनले भोटेकोशी क्षेत्रका बाढीपीडितका लागि डेढ करोड रुपैयाँ बराबरको सहयोग जुटाएको छ। फाउन्डेसनका अध्यक्ष बिमल श्रेष्ठका अनुसार अमेरिकामा रहेका नेपाली समुदायबाट संकलन गरिएको रकम प्रधानमन्त्री राहत कोषमा पठाइएको छ।
संकलन अभियानमा ९९ हजार ६४ अमेरिकी डलर जम्मा भएको थियो, जुन नेपाली रुपैयाँमा एक करोड ५१ लाख हुन आउँछ। बैंक शुल्क कटाएपछि ९७ हजार ८७५ अमेरिकी डलर, अर्थात् एक करोड ४८ लाख रुपैयाँ, राहत कोषमा जम्मा गरिएको फाउन्डेसनले जनाएको छ।
वासिङ्टन डीसीस्थित नेपाली राजदूतावाससँगको सहकार्यमा जुममार्फत आयोजित कार्यक्रममा रकम पठाइएको घोषणा गरिएको थियो। कार्यक्रममा फाउन्डेसनका पदाधिकारी, विभिन्न संघसंस्थाका प्रतिनिधि र अन्य विशिष्ट व्यक्तिहरू सहभागी थिए।
दक्षिणी क्यालिफोर्नियामा क्रियाशील संघसंस्था, नेपाली समुदाय र अन्य समुदायका सहयोगीहरूले अभियानमा उल्लेखनीय योगदान गरेको फाउन्डेसनले बताएको छ। प्रवासमा रहेर पनि मातृभूमिको विपद्लाई आफ्नै पीडा ठानेर सहयोग गर्नु देशप्रेम र मानवीय संवेदनाको उदाहरण भएको फाउन्डेसनको भनाइ छ।
फाउन्डेसनले यसअघि नेपालमा भूकम्प जाँदा पनि राहत र सहयोगका कार्यक्रम सञ्चालन गरेको थियो। सहयोग संकलनमा साथ दिने सबै संघसंस्था, प्रतिनिधि र सहयोगीप्रति फाउन्डेसनले आभार व्यक्त गरेको छ।
