चितवनका जग्गा तथा आवास व्यवसायीहरूले जग्गा कित्ताकाट खुला गर्न र भू-उपयोगसम्बन्धी नीतिलाई स्पष्ट बनाउन सरकारसँग आग्रह गरेका छन्। भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावलसँग सौराहामा भएको भेटमा व्यवसायीहरूले जग्गा कारोबारमा देखिएका कठिनाइबारे जानकारी गराउँदै समाधानका लागि ध्यानाकर्षण गराएका हुन्।
नारायणी जग्गा तथा आवास व्यवसायी सङ्घका अध्यक्ष बाबुराम अधिकारीको नेतृत्वमा गएको टोलीमा वरिष्ठ उपाध्यक्ष हेमन्त केसी (हरि), उपाध्यक्ष जयराम खत्री, कार्यसमिति सदस्य शङ्कर सिटौला, आईपी थापालगायत सहभागी थिए।
भेटमा अध्यक्ष अधिकारीले जग्गा कारोबारबाट राज्यले ठूलो राजस्व पाउने भएकाले यो क्षेत्रलाई व्यवस्थित र चलायमान बनाउनुपर्ने बताए। उनले कित्ताकाटमा देखिएका अवरोध हटाउन, भू-उपयोग नीतिमा रहेको अन्योल अन्त्य गर्न र लाभकर तथा राजस्वसम्बन्धी व्यवस्थालाई व्यवसायीमैत्री बनाउने गरी पुनरावलोकन गर्न आग्रह गरे।
व्यवसायीहरूका अनुसार जग्गा कारोबारमा देखिएको समस्याले व्यवसायीलाई मात्र होइन, सर्वसाधारणको किनबेच र घर निर्माणमा समेत असर परेको छ। नीतिगत स्पष्टता र सहज प्रक्रियाले घरजग्गा क्षेत्र चलायमान हुने र सरकारी राजस्व बढ्ने उनीहरूको भनाइ छ।
जवाफमा मन्त्री रावलले भू-उपयोग नीति स्पष्ट पार्दै जग्गा कारोबारका समस्या समाधान गर्न सरकार गम्भीर रहेको बताइन्। व्यवसायीहरूका अनुसार मन्त्रीले कित्ताकाट खुलाउने विषयमा छिट्टै सहजीकरण गर्ने आश्वासन दिएकी छन्। नीतिगत अन्योल हटेमा घरजग्गा कारोबार व्यवस्थित हुने र आवास निर्माण सहज हुने अपेक्षा गरिएको छ।
