काठमाडौं — खोप क्षेत्रमा काम गर्ने अन्तर्राष्ट्रिय साझेदारी संस्था गाभी, द भ्याक्सिन एलाइन्सले सन् २०३० सम्म नेपाललाई ठूलो परिमाणमा खोप सहयोग गर्ने भएको छ। उक्त सहयोगको कुल मूल्य ८ अर्ब ५९ करोड १९ लाख ६८ हजार रुपैयाँ बराबर पुग्नेछ।
स्वास्थ्य तथा खाद्य स्वच्छता मन्त्री निशा मेहताले यो जानकारी सार्वजनिक गरेकी हुन्। कूटनीतिक पहलमार्फत नेपालले आफ्नो नियमित खोप कार्यक्रमका लागि गाभीबाट यो सहयोग प्राप्त गर्न लागेको उनले बताएकी छन्।
यसका साथै, नेपालले फिर्ता गर्नुपर्ने भनी देखाइएको ३ लाख ८ हजार २७१ अमेरिकी डलर रकम पनि गाभीले मिनाहा गर्ने भएको छ। मन्त्री मेहताको सचिवालयका अनुसार गाभीसँग भएको संवादले सहयोगसम्बन्धी विषयमा सहजीकरण भएको हो र मिनाहाले राष्ट्रिय खोप कार्यक्रमको वित्तीय व्यवस्थापनमा महत्वपूर्ण सहयोग पुग्नेछ।
नेपालले राष्ट्रिय खोप कार्यक्रममार्फत बालबालिका तथा लक्षित जनसङ्ख्यालाई विभिन्न संक्रामक रोगबाट जोगाउँदै आएको छ। नियमित खोप सेवाको निरन्तरता, पहुँच र प्रभावकारिता कायम राख्न अन्तर्राष्ट्रिय साझेदारबाट प्राप्त हुने सहयोग महत्वपूर्ण रहँदै आएको छ।
गाभीबाट प्राप्त हुने नयाँ सहयोगले खोप कार्यक्रमलाई अझ बलियो बनाउने र धेरै बालबालिकासम्म सेवा पुर्याउन मद्दत गर्ने अपेक्षा गरिएको छ।
