बङ्गालको खाडीमा बनेको ‘अर्णव’ चक्रवातका कारण भारी वर्षा हुन सक्ने भएकाले मकवानपुरमा उच्च सतर्कता अपनाउन जिल्ला प्रशासन कार्यालयले आग्रह गरेको छ।
जल तथा मौसम विज्ञान विभाग र राष्ट्रिय विपद् जोखिम न्यूनीकरण तथा व्यवस्थापन प्राधिकरणको विशेष बुलेटिनअनुसार कात्तिक ११ देखि १४ गतेसम्म मकवानपुरसहित बागमती प्रदेशका विभिन्न ठाउँमा भारी वर्षाको सम्भावना छ।
सहायक प्रमुख जिल्ला अधिकारी शेषकान्त पौडेलले आज जारी गरेको सूचनामा भारी वर्षाले नदी र खोलामा अचानक बाढी आउने, किनार कटान हुने, डुबान पर्ने र पहिरो जाने जोखिम रहेकाले आवश्यक सावधानी अपनाउन भनिएको छ।
प्रशासनले पाकेको धानबाली र अन्य कृषिउपज सुरक्षित रूपमा भित्र्याउन आग्रह गरेको छ। वर्षा भइरहेको बेला बाली नकाट्न, नदी र खोला नतर्न र माछा मार्ने वा दाउरा खोज्नेजस्ता जोखिमपूर्ण काम नगर्न अनुरोध गरिएको छ।
त्रिभुवन राजपथ, कान्ति लोकपथ, हेटौँडा–काठमाडौँ छोटो मार्ग र ग्रामीण सडकमा पहिरोको जोखिम रहेकाले अत्यावश्यक कामबाहेक लामो दूरी र रातिको यात्रा नगर्न भनिएको छ। यात्रा गर्नै परेमा सडकको अवस्था बुझेर मात्र निस्कन आग्रह गरिएको छ। बालबालिका, ज्येष्ठ नागरिक, गर्भवती, अपाङ्गता भएका व्यक्ति, बिरामी र चौपायालाई सुरक्षित ठाउँमा राख्न र महत्त्वपूर्ण कागजात जोगाएर राख्न पनि प्रशासनले अनुरोध गरेको छ।
