बङ्गालको खाडीमा बन्दै गरेको अर्णव चक्रवातको बाँकी भाग नेपालतर्फ सर्ने सम्भावना देखिएको छ। त्यससँगै देशका विभिन्न ठाउँमा वर्षा हुने र अग्ला हिमाली क्षेत्रमा हिमपातको जोखिम रहेको मौसमविद्हरूले बताएका छन्।
जल तथा मौसम विज्ञान विभागकी वरिष्ठ मौसमविद् विभूति पोखरेलका अनुसार यो प्रणालीले धेरै जलवाष्प बोकेर ल्याउने र माथिल्लो वायुमण्डलमा रहेको अर्को प्रणालीसँग मिसिने भएकाले नेपालमा वर्षा हुने अवस्था बनेको हो।
सुरुआती आकलनमा बिहीबार साँझदेखि शनिबारसम्म यो प्रणालीको असर रहने देखिएको छ। तर प्रणाली अझै बङ्गालको खाडीमै रहेकाले यसको गति, शक्ति र नेपाल छिर्दाको अवस्थाअनुसार वर्षाको मात्रा फरक पर्न सक्ने विभागले जनाएको छ।
वर्षाको सम्भावना भए पनि डराउनुपर्ने अवस्था नरहेको र जोखिम भएका ठाउँमा भने पहिल्यै सावधानी अपनाउनुपर्ने पोखरेलको भनाइ छ। उनका अनुसार नेपाल नजिक आइपुग्दा यो न्यून चापीय क्षेत्र कमजोर हुन सक्छ। धेरै ठाउँमा हल्कादेखि मध्यम वर्षा र केही ठाउँमा भारी वर्षा हुन सक्छ। अग्ला हिमाली क्षेत्रमा हिमपात, हिमआँधी र हिमपहिरोको जोखिम हुने भएकाले त्यहाँ रहेका पर्यटकले सुरक्षित ठाउँमा बस्नुपर्छ र माथिल्लो क्षेत्रतिर यात्रा गर्नु हुँदैन।
पहिरो जान सक्ने सडक र क्षेत्रमा यात्रा गर्दा विशेष ध्यान दिन सर्वसाधारणलाई आग्रह गरिएको छ। अहिले धान काट्ने बेला भएकाले खेतीपातीमा असर पर्न सक्ने भन्दै विभागले दिने नयाँ जानकारी हेरेर मात्र धान काट्न किसानलाई सुझाव दिइएको छ।
